استانادا قانشا ادام تۇرعىن ءۇي كەزەگىندە تۇر

  استانا. KAZINFORM - ەلوردادا تۇرعىن ءۇي كەزەگىندە تۇرعانداردىڭ سانى ايتىلدى.

«استانادا تۇرعىن ۇيگە كەزەگىندە 40872 ادام تۇر. ونىڭ ىشىندە باسپانا كەزەگىندە تۇرعان 2685 جەتىم جانە اتا- اناسىنىڭ قامقورلىعىنسىز قالعان بالا بار. مەملەكەتتەن بەرىلەتىن تۇرعىن ءۇيدىڭ %20 حالىقتىڭ الەۋمەتتىك وسال توپقا جاتادى»، - دەدى كوممۋنالدىق ينفراقۇرىلىمدى دامىتۋ باسقارماسى باسشىسىنىڭ ورىنباسارىنىڭ مىندەتىن اتقارۋشى باقىتجان جولمۇقان ماسليحات جانىنداعى قوعامدىق كەڭەس وتىرىسىندا.

اكىمدىك وكىلىنىڭ ايتۋىنشا، قازىر جەتىم بالالارعا 173 پاتەر بەرۋ جاعى قاراستىرىلىپ جاتىر.

«وتكەن جىلى جازدا تۇرعىن ۇيگە كەزەگىندە 48 مىڭ ادام تۇرعان، بۇگىندە 40 مىڭ ادامدى قۇرايدى»، - دەپ تولىقتىردى وكىل.

ەسكە سالا كەتسەك، ەلوردا اكىمى جەڭىس قاسىمبەك Kazinform اگەنتتىگىنە بەرگەن سۇحباتىندا تۇرعىن ءۇي ماسەلەسىن قوزعاعان ەدى.

شاھار باسشىسىنىڭ ايتۋىنشا، سوڭعى ەكى جىل ىشىندە قۇرىلىسى ۇزاققا سوزىلعان 140 تان استام تۇرعىن ءۇي كەشەنى اياقتالدى.