استانادا قالاي ۆولونتەر اتانۋعا بولادى
ەوردادا 50 جاستان اسقان بەلسەندى تۇرعىنداردان قۇرالعان ەرىكتىلەر قوزعالىسى بار. بۇل تۋرالى استانا قالاسىنىڭ جاستار ساياساتى ماسەلەلەرى باسقارماسى باسشىسىنىڭ مىندەتىن اتقارۋشى باعدات اتىمتاي ايتتى، دەپ حابارلايدى Kazinform.
«استانا قالاسى حالقىنىڭ سانى 1,3 ميلليوننان ادامنان استى، ونىڭ ىشىندە 14-35 جاس ارالىعىنداعى جاستار سانى 440 مىڭ ادامدى قۇرادى. „استانا جاستارى“ رەسۋرستىق ورتالىعىنىڭ بازاسىندا قالالىق ۆولونتەرلەر شتابى جۇمىس ىستەپ جاتىر. وندا 40 بەلسەندى ۆولونتەرلىك جانە قايىرىمدىلىق ۇيىمدارىمەن سەرىكتەستىك ورناتىلعان. شتابتا 5000 استام بەلسەندى ۆولونتەر تىركەلگەن»، - دەدى ب. اتىمتاي استانا قالاسىنىڭ كوممۋنيكاتسيالار قىزمەتىندە حالىقارالىق ۆولونتەر كۇنى قارساڭىندا وتكەن بريفينگىدە.
ونىڭ ايتۋىنشا، ۆولونتەرلىك ۇيىمدارمەن بىرگە «BizBirgemiz»، «قاۋىپسىز قالا» ، «قامقورلىق مەكەن- جايى» ، «ارداگەرلەردى ارداقتايىق» ، «Taza Alem» جانە باسقا دا جوبالار اياسىندا 780 اكسيا ىسكە اسىرىلدى. «قامقورلىق مەكەن- جايى» جوباسى اياسىندا «استانا جاستارى» ۆولونتەرلەرى 30 جالعىزباستى زەينەتكەردىڭ ۇيىنە بارىپ، كومەكتەسكەن. سونىمەن قاتار، كاسىپورىندار مەن ۆولونتەرلىك ۇيىمدار قار تازالاۋ بويىنشا 50 اكسيا وتكىزدى. بارلىعى 2000 ادام قامتىلدى. جوبا اياسىندا قوسىمشا ازىق- تۇلىك سەبەتتەرى ۇنەمى جەتكىزىلىپ تۇرادى. اتاپ ايتقاندا، «تازا الەم» جوباسى اياسىندا 40 ەكولوگيالىق سەنبىلىك ۇيىمداستىرىلدى.
«سونىمەن قاتار، ۆولونتەرلەر قالالىق جانە حالىقارالىق ءىس- شارالارعا بەلسەندى قاتىسىپ كەلەدى. ەرىكتىلەر حالىقارالىق جانە رەسپۋبليكالىق دەڭگەيدەگى 140 ءىس- شاراعا قاتىستى. قالادا 50 ۆولونتەرلىك ۇيىم مەن قوزعالىس تۇراقتى نەگىزدە جۇمىس ىستەپ جاتىر، ونىڭ 17 ءسى مۇمكىندىگى شەكتەۋلى بالالار مەن جاستاردى تاربيەلەپ وتىرعان وتباسىلارعا كومەكتەسىپ كەلەدى. ولار اتا- انالارعا ترەنينگتەر وتكىزىپ، قاجەت كيىم- كەشەك پەن تۇرمىستىق زاتتاردى تاراتادى، بالالار مەن اتا- انالاردى ءىس- شارالارعا شاقىرادى. جىل سايىن قورلار „مەكتەپكە جول“ اكسياسىن وتكىزىپ، مۇمكىندىگى شەكتەۋلى بالالارعا ارنالعان ءىس- شارالار ۇيىمداستىرادى»، - دەدى باسقارما وكىلى.
ونىڭ سوزىنە قاراعاندا، ەلوردادا 50 جاستان اسقان بەلسەندى ازاماتتار قوزعالىسى بار. ولاردىڭ قاتارىندا 60 تان استام ەرىكتى قىزمەتىپ ءجۇر.
«ۆولەنتەر رەتىندە تىركەلۋ ءۇشىن ءبىزدىڭ كەڭسەگە كەلىپ (سارىارقا 13، 518-كابينەت)، قوسىمشا اقپارات الۋعا بولادى. سونىمەن قاتار، astana_zhastary_volunters ينستاگرام پاراقشاسىنا جازىلىپ، باقىلاۋ مۇمكىندىگى بار»، - دەدى باعدات اتىمتاي.
