استانادا ناسىباي وندىرەتىن جەراستى سەحى جويىلدى

насвай
Фото: акимат Астаны

استانا. KAZINFORM - استانادا قۇقىق قورعاۋ ورگاندارىنىڭ قىزمەتكەرلەرى رەيد بارىسىندا 2 توننادان استام ناسىباي ءونىمىن تاركىلەدى، دەپ حابارلايدى ەلوردا اكىمدىگىنىڭ رەسمي سايتى.

استانادا تىيىم سالىنعان تەمەكى قوسپاسىمەن بەلسەندى كۇرەس ءجۇرىپ جاتىر. ەلوردانىڭ بارلىق اۋدانىندا ۆەيپ پەن ناسىبايدىڭ زاڭسىز تارالۋى مەن قولدانىلۋىن انىقتاۋ بويىنشا رەيدتەر جۇرگىزىلۋدە.

پوليتسەيلەر ساۋدا ورىندارىن تەكسەرىپ، تاراتۋشىلاردى اكىمشىلىك جاۋاپكەرشىلىككە تارتتى. رەيدتىك ءىس- شارالار اپتالىعىندا ەلوردانىڭ بەس اۋدانىندا 500 دەن استام ساۋدا ورنى تەكسەرىلدى.

پوليتسيا دەپارتامەنتىنىڭ قىزمەتكەرلەرى اۋدان اكىمدىكتەرىمەن بىرلەسىپ، شەگىلمەيتىن تەمەكى ونىمدەرىن ساتۋدىڭ 70 كە جۋىق فاكتىسىن، ونىڭ ىشىندە ناسىباي ءوندىرىسى بويىنشا جەراستى تسەحتارىن انىقتادى.

رەيد بارىسىندا بايقوڭىر اۋدانىندا پوليتسيا قىزمەتكەرلەرى ناسىباي وندىرەتىن تسەحتى تاپتى. تاركىلەنگەن زاڭسىز ءونىمنىڭ جالپى سوماسى 10 ميلليون تەڭگەدەن اسادى.

насвай
Фото: акимат Астаны

استانا قالاسى پوليتسيا دەپارتامەنتىنىڭ قىزمەتكەرلەرى رەيد بارىسىندا وماروۆ جانە اسان قايعى كوشەلەرىنىڭ قيىلىسىنداعى جەر ۇيدە 2 توننا ناسىباي ساقتالعانىن انىقتادى.

ناتيجەسىندە زاڭ بۇزۋشىلارعا 25 ايلىق ەسەپتىك كورسەتكىش (ا ە ك) مولشەرىندە ايىپپۇل سالۋ تۇرىندە اكىمشىلىك قۇقىق بۇزۋشىلىق تۋرالى كودەكستىڭ (ا ق ب ت ك) 196-بابىنا سايكەس اكىمشىلىك جاۋاپكەرشىلىككە تارتىلدى. بارلىق ونىمدەر تاركىلەندى.

ەلوردانىڭ ساۋدا ورىندارى بويىنشا رەيدتەر كۇن سايىن ءجۇرىپ جاتىر.

سوڭعى جاڭالىقتار