استانادا ەكى مىڭعا جۋىق ەتنيكالىق قازاق قانداس مارتەبەسىن الدى

  استانا. KAZINFORM - وتكەن جىلى استانادا 1909 ادامعا قانداس مارتەبەسى بەرىلدى. بۇل تۋرالى قالالىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى يليا سكۋب ايتىپ بەردى.

«وتكەن 2023 -جىلى 1301 ادامعا قانداس مارتەبەسىن بەرۋ جوسپارلاندى جانە ناتيجەسىندە 1909 ادام (ەرلەر – 997، ايەلدەر - 912) بۇل مارتەبەنى الدى. ونىڭ ىشىندە: وزبەكستاننان – 810، رەسەي فەدەراتسياسىنان – 483، ق ح ر – 465، موڭعوليادان – 108، قىرعىزستاننان – 20، تۇرىكمەنستاننان – 14، تاجىكستاننان – 1، ۇلىبريتانيادان – 2، اۋعانستاننان – 1، تۇركيادان – 2، ۋكراينادان - 2 جانە يراننان - 1 ادام بار»، - دەدى يليا سكۋب قالالىق ءماسليحات وتىرىسىندا.

سپيكەر 2023 -جىلدىڭ 1-شىلدەسىندە بيزنەس- يمميگرانتتار بولىپ سانالاتىن ەتنيكالىق قازاقتار نەمەسە سۇرانىسقا يە كاسىپتەرى بار ادامدار ءۇشىن ازاماتتىعىن جوعالتپاي «اتا جولى» كارتاسىن بەرۋ فۋنكتسياسى ەنگىزىلگەنىن ەسكە سالدى. كارتا يەلەرى 10 جىل مەرزىمگە تۇرۋعا رۇقسات الادى.

ونىڭ دەرەكتەرى بويىنشا، 2023 -جىلى «اتا جولى» كارتاسى 21 ادامعا بەرىلدى: 7 - بيزنەس- يمميگرانتتار، 14 سۇرانىسقا يە ماماندىقتارى بار ادامدار. ولاردىڭ ىشىندە رەسەي فەدەراتسياسىنان - 12، موڭعوليادان - 4، تۇرىكمەنستاننان - 1، گەرمانيادان - 1، تۇركيادان - 1، اۋستريادان - 1، يزرايلدەن - 1 ەتنيكالىق قازاق بار. سونداي- اق 6 ەتنيكالىق قازاقتىڭ ءوتىنىمى قابىلدانباعان.

اۆتور

ايجان سەرىكجان قىزى