استانادا كۇن سايىن 40 ادامنان قىزىلشا انىقتالادى
استانا. KAZINFORM - بۇل تۋرالى استانا قالاسىنىڭ باس مەملەكەتتىك سانيتاريالىق دارىگەرى سارحات بەيسەنوۆا ايتتى. قىزىلشامەن اۋىرعان 152 بالانىڭ%92 ى ەكپە الماعاندار.
ونىڭ سوزىنشە، جىل باسىنان بەرى استانادا قىزىلشانىڭ 576 باستاپقى جانە 216 راستالعان جاعدايى تىركەلدى، ونىڭ ىشىندە 14 جاسقا دەيىنگى بالالار اراسىندا 152 جاعداي.
«كۇنىنە قىزىلشانىڭ 40 قا جۋىق جاعدايى تىركەلەدى، سول سەبەپتى ەلورداداعى قىزىلشاعا قاتىستى جاعداي ءالى دە شيەلەنىسە تۇسۋدە. ايتا كەتۋ كەرەك، 152 ناۋقاسقا شالدىققان بالانىڭ ىشىنەن 92 پايىزى قىزىلشاعا قارسى ۆاكتسينا الماعان، ولاردىڭ اتا- انالارى قىزىلشانى جويۋعا قول جەتكىزۋ جانە قولداۋ جولىندا ايتارلىقتاي كەرى ىقپالىن تيگىزۋدە"، - دەدى سپيكەر.
ونىڭ مالىمەتىنشە، ناۋقاستاردىڭ ىشىندە قىزىلشاعا قارسى ەكپە العاندار تەك 6 پايىزدى قۇرايدى، ال ۆاكسيناتسيا مارتەبەسى بەلگىسىز ناۋقاستار 26 پايىز.
" قىزىلشانىڭ تارالۋىن بولدىرماۋ ءۇشىن توپتىق يممۋنيتەتىنىڭ جالپى كورسەتكىشى بۇكىل حالىق اراسىندا 85-90 پايىزدان كەم بولماۋى كەرەك ەكەنىن تاعى دا ەسكە سالامىن. وسىعان بايلانىستى ۇلتتىق ۆاكتسيناتسيا كۇنتىزبەسىنە سايكەس، ۆاكتسينا الماعان بالالاردى انىقتاۋ جۇمىستارى جالعاسىپ جاتىر. وسىلايشا 1 جانە 6 جاستا قىزىلشاعا قارسى ەگىلمەگەن 7-18 جاس ارالىعىنداعى انىقتالعان 13000 بالانىڭ 10371 ءى يممۋنيزاتسيامەن قامتىلدى، بۇل 79,8 پايىزدى قۇرايدى"، - دەپ اتاپ ءوتتى سارحات بەيسەنوۆا.
ول 2023 -جىلى 6 - قاراشادان باستاپ اعىمداعى ۋاقىتقا دەيىن قوسىمشا جاپپاي يممۋنداۋعا جاتاتىن كونتينگەنتتىڭ، ياعني 121000 ادامنىڭ 67168 ءى ەگىلگەنىن جەتكىزدى. بۇل 55,5 پايىزدى قۇرايدى. ونىڭ ىشىندە، 6 ايدان 10 اي 29 كۇندىك ۆاكتسيناتسينالاۋعا جاتاتىن 24000 بالانىڭ 9363 ى نەمەسە 39 پايىزى ەكپەمەن قامتىلدى.
ايتا كەتەيىك، 2-4 جاستاعى ۆاكتسيناتسيالاۋعا جاتاتىن 78000 بالانىڭ 41922 ءسى نەمەسە 53,7 پايىزى ەكپە الدى. سونىمەن قوسا، ۆاكتسيناتسيا الۋعا جاتاتىن 6000 مەديتسينا قىزمەتكەرىنىڭ 5512 ءسى نەمەسە 91,9 پايىزى ۆاكسيناتسيالانعان.
