استانادا كۇن سايىن 30 دان استام بالا قىزىلشا جۇقتىرىپ جاتىر

استانا قالاسىنىڭ باس سانيتار دارىگەرى سارحات بەيسەنوۆا ەلورداداعى ەپيداحۋال تۋرالى مالىمەت بەردى، دەپ حابارلايدى Kazinform.

«ەلوردادا كۇن سايىن قىزىلشانىڭ 35 كە جۋىق جاعدايى تىركەلەدى. 2023-جىلدىڭ ناۋرىز ايىنان باستاپ قىزىلشانىڭ 2537 باستاپقى جاعدايى تىركەلدى. ونىڭ ىشىندە 806 جاعداي راستالعان دياگنوز جانە ونىڭ 71 پايىزى (570 جاعداي) 14 جاسقا دەيىنگى بالالار اراسىندا تاراپ وتىر. ناۋقاستاردىڭ 9 پايىزى (75 جاعداي) – جاس وسپىرىمدەر، 20 پايىزى (161 جاعداي) - ەرەسەكتەر. ناۋقاستار اراسىندا ۆاكتسينا الماعان بالالاردىڭ ۇلەسى 70 پايىز (556) جانە 24 پايىزى - ەگۋ مارتەبەسى بەلگىسىز ەرەسەكتەر. ەكپە الىپ، كەيىن اۋىرىپ قالعان بالالاردىڭ ۇلەسى 6 پايىز عانا. وكىنىشكە قاراي، قىزىلشا جۇقتىرعان ناۋقاسپەن تىعىز بايلانىستا بولعان ادامداردىڭ ۆاكسينادان باس تارتقان جاعدايلارى بار. قىزىلشامەن اۋىرعانداردىڭ ىشىندە 48 پايىزى نەمەسە 267 بالا ۆاكسيناتسياعا سەنبەگەندىكتەن، 27 پايىزى (151) - مەديتسينالىق قارسى كورسەتىلىمگە بايلانىستى، 17 پايىزى (98) - ەكپە جاسىنا جەتپەۋىنە بايلانىستى جانە 7 پايىزى اتا-انالارىنىڭ نەمقۇرايلىلىعى سەبەبىنەن ۆاكسينا الماعان»، - دەدى ول وڭىرلىك كوممۋنيكاتسيالار قىزمەتىندە وتكەن بريفينگىدە.

سونداي-اق ول قىزىلشاعا قارسى ۆاكسينا مەديتسينادا كەيىنگى 60 جىل بويى قولدانىلىپ كەلە جاتقانىن ەسكە سالدى.

«سول سەبەپتى مەن اتا-انالاردى بالالارىنا دەر كەزىندە قىزىلشاعا قارسى ەكپە سالدىرتۋعا شاقىرامىن. 6-10 ايلىق جانە 2-5 جاس ارالىعىنداعى بالالارعا قوسىمشا يممۋنيزاتسيا الۋ قاجەت»، - دەدى سارحات بەيسەنوۆا.