استانادا «كەمەل جىگىت - كۇيەۋ بالا» ۇلتتىق زياتكەرلىك كۋرسى اشىلدى
استانا. KAZINFORM - بۇگىن «بايتەرەك» مونۋمەنتىنىڭ الاڭىندا «كەمەل جىگىت- كۇيەۋ بالا» ۇلتتىق زياتكەرلىك كۋرسىنىڭ سالتاناتتى اشىلۋ ءراسىمى ءوتتى. ءىس-شارانى استانا قالاسى اكىمدىگىنىڭ ءدىن ىستەرى جونىندەگى باسقارماسى جانە دىندەردى زەرتتەۋ ورتالىعىمەن بىرلەسىپ ۇيىمداستىردى.
- «كەمەل جىگىت - كۇيەۋ بالا» زياتكەرلىك كۋرسىنا قاتىسىپ جاتقان جاستارعا ەگەمەندى ەلىمىزدىڭ جاستاردىڭ رۋحاني، عىلىمي، مادەني دامۋىنا مەملەكەت تاراپىنان كوپ قولداۋ ءبىلدىرىپ جاتىر. جاستاردى وتانسۇيگىشتىك پەن اۋىزبىرشىلىككە، ەل تاريحى مەن مادەنيەتىن ۇمىتپاۋعا، ۇلكەندەردى قۇرمەتتەپ، كىشىلەرگە ىزەت بىلدىرۋگە ۇندەيمىن، - دەدى استانا قالاسى ءماسليحاتىنىڭ ءتوراعاسى - كاناليموۆ ەرلان ەرمەك ۇلى.
ەكىنشى ءسوز كەزەگى «ىرىسكەلدى قاجى» مەشىتىنىڭ باس يمامى - اسانوۆ نۇرلان بايجىگىت ۇلىنا بەرىلدى.
-زياتكەرلىك كۋرستىڭ اتاۋىنىڭ ءوزى ماڭىزدى. ءاربىر جاس - بولاشاق اكە مەن بولاشاق انا. حالقىمىزدىڭ سان ءتۇرلى سالت داستۇرلەرىنىڭ قۇندىلىقتارىن ۇمىتپاۋ كەرەك. يماندىلىقتى بويىمىزعا سىڭىرۋدەن بولەك، ءتانىمىزدى شىنىقتىرۋ ارقىلى كەمەلدىككە قول جەتكىزۋگە بولادى. بۇگىنگى ساپارعا شىققالى وتىرعاندارعا اق جول تىلەيمىن، - دەدى باس يمام.
ءسوز سوڭىن اتا-انا قاۋىمىنان سامەك نۇرلىبەك ەسىمدى ازامات اياقتاپ، وسىنداي شارالاردىڭ وتكىزىلىپ جاتقانىنا ريزاشىلىعىن ءبىلدىرىپ، ەل اعالارى مەن ۇيىمداستىرۋشىلارعا العىسىن ايتتى.
ايتا كەتۋ كەرەك، «كەمەل جىگىت- كۇيەۋ بالا» ۇلتتىق زياتكەرلىك كۋرسى «بۋراباي» ۇلتتىق پاركىنىڭ اۋماعىنداعى «جەتى قازىنا» ەتنو اۋىلىندا ەكى كۇن بويى وتەدى. بۇل كۋرستىڭ ماقساتى - جاستار اراسىنداعى ۇلتتىق قۇندىلىقتار مەن تاريحي سانانى جاڭعىرتۋ، قازاق بولمىسى مەن داستۇرلەرىن دارىپتەۋ.
ءىس-شاراعا 60 بالا قاتىستى. كۋرس بارىسىندا تەوريالىق جانە پراكتيكالىق ساباقتار وتكىزىلەدى. تەوريالىق ساباقتار «قازاق تاريحى مەن داستۇرلەرى»، «ماقال- ماتەلدەردەگى ۇلتتىق تاربيە»، «جىگىتىڭ ءۇش جۇرتى» باعىتتارىن قامتيدى. پراكتيكالىق ساباقتار جاسوسپىرىمدەرگە مال سويۋ، ونى جىلىكتەۋ، تۇزداۋ، ءۇيىتۋ ادىستەمەسى، ەت تۋراۋ، تاباق تارتۋ، جىلقى جانۋارىنىڭ قاسيەتتەرى، ات ابزەلدەرىمەن تانىسۋ، اتقا ءمىنۋ جانە ساداق اتۋ جانە ت. ب. سياقتى ءداستۇرلى داعدىلاردى تاربيەلەۋگە ارنالعان.
كۋرس بارىسىندا بالالارىنىڭ ونەرىن تاماشالاۋعا كەلگەن اتا- انالارىنا دا ۇلتتىق قۇندىلىقتارعا نەگىزدەلگەن تانىمدىق دارىستەر مەن «كاسىپكەرلىك نەگىزدەرى»، «جاس ءوسپىرىم بالالار مەن اتا- انالاردىڭ قارىم- قاتىناسى» تاقىرىپتارىندا سەمينار- ترەنينگتەر ۇيىمداستىرىلادى.
