استانادا «كەكىلبايەۆ تۇلعاسى» كىتابىنىڭ تۇساۋكەسەرى ءوتتى

استانا. قازاقپارات - 2026 -جىلعى 15-ساۋىردە قازاقستان رەسپۋبليكاسى مەملەكەتتىك باسقارۋ اكادەمياسىندا قازاق رۋحانياتىنىڭ كورنەكتى وكىلى، قازاقستاننىڭ ەڭبەك ەرى، مەملەكەت جانە قوعام قايراتكەرى، كورنەكتى جازۋشى ءابىش كەكىلباي ۇلىنىڭ ءومىرى مەن قىزمەتىنە ارنالعان «كەكىلبايەۆ تۇلعاسى» كىتابىنىڭ تۇساۋكەسەر ءراسىمى ءوتتى.

ءىس-شارانىڭ ماقساتى - ءابىش كەكىلباي ۇلىنىڭ ونەگەلى ءومىر جولىن مەملەكەتتىك قىزمەتكە قىزىعۋشىلىق تانىتاتىن جاستار اراسىندا ناسيحاتتاۋ، ونىڭ تۇلعالىق جانە كاسىبي مۇراسىن دارىپتەۋ. تۇساۋكەسەر راسىمىنە جازۋشىنىڭ ۇرپاقتارى، مەملەكەت جانە قوعام قايراتكەرلەرى، زيالى قاۋىم وكىلدەرى، قازاقستان رەسپۋبليكاسى پارلامەنتىنىڭ دەپۋتاتتارى، سونداي-اق مەملەكەتتىك ورگانداردىڭ وكىلدەرى قاتىستى.

قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ ءتوراعاسى دارحان جازىقباي قۇتتىقتاۋ سوزىندە مەملەكەتتىك قىزمەتشىلەردىڭ تۇلعالىق الەۋەتىن دامىتۋ باعىتىندا «تۇلعا تانۋ» جوباسى اياسىندا جۇيەلى جۇمىستار جۇرگىزىلىپ كەلە جاتقانىن اتاپ ءوتتى.

اگەنتتىك ءتوراعاسى ءوز سوزىندە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ ءابىش كەكىلباي ۇلى تۋرالى پىكىرىن كەلتىردى: «ءابىش كەكىلباي ۇلى ناعىز تاۋ تۇلعالى ازامات ەدى. ول ىشكى مادەنيەتى وتە جوعارى جان بولاتىن. ونىمەن تىلدەسكەن ادامدار رۋحتانىپ، قاناتتانىپ شىعاتىن. ءبىر سوزبەن ايتساق، ءابىش كەكىلباي ۇلى ناعىز زيالى ادام، كەمەڭگەر تۇلعا بولدى».

سونداي-اق ءابىش كەكىلباي ۇلىنىڭ ءومىر جولى شىعارماشىلىق پەن مەملەكەتتىك قىزمەتتى قاتار الىپ جۇرۋىمەن ەرەكشەلەنەتىنىن ايتتى. ول قازاقستان جوعارعى كەڭەسىنىڭ ءتوراعاسى، مەملەكەتتىك حاتشى، پارلامەنت دەپۋتاتى رەتىندە ەل دامۋىنا ەلەۋلى ۇلەس قوسىپ، مەملەكەتتىك باسقارۋ جۇيەسىن نىعايتۋعا قىزمەت ەتكەنىن ايرىقشا اتاپ ءوتتى.

كىتاپتا ءابىش كەكىلباي ۇلىنىڭ ءومىرىنىڭ ءار كەزەڭى، شىعارماشىلىق جانە قوعامدىق-ساياسي قىزمەتى، تۇلعالىق قالىپتاسۋ جولى جان-جاقتى قامتىلعان. سونىمەن قاتار، ونىڭ ادامگەرشىلىك قاسيەتتەرى، كۇردەلى كەزەڭدەردە شەشىم قابىلداۋداعى كورەگەندىگى، مەملەكەتشىلدىك ۇستانىمى، ەل بىرلىگى مەن قوعامدىق كەلىسىمدى نىعايتۋعا قوسقان ۇلەسى كەڭىنەن باياندالادى. جيناققا زامانداستارىنىڭ ەستەلىكتەرى، پىكىرلەرى مەن تاريحي دەرەكتەر ەنگىزىلگەن.

كىتاپ اۆتورلارى - ۇلان ايحوجا مەن اباي سەيفۋللا.

اتالعان جوبا قازاقستان رەسپۋبليكاسى مەملەكەتتىك قىزمەت ىستەرى اگەنتتىگىنىڭ «تۇلعا تانۋ» باعىتى اياسىندا جۇزەگە اسىرىلىپ وتىرعان جۇمىستاردىڭ جالعاسى. بۇعان دەيىن وسى باستاما شەڭبەرىندە جارىق كورگەن «ساپاربايەۆ تۇلعاسى» كىتابى وقىرماندار تاراپىنان وڭ باعاسىن العان. ال «كەكىلبايەۆ تۇلعاسى» كىتابى وسى رۋحاني ساباقتاستىقتىڭ زاڭدى جالعاسى.

ايتا كەتەيىك، وسىعان دەيىن ءابىش كەكىلبايەۆتىڭ ءومىرى مەن شىعارماشىلىعىنا ارنالعان ەنسيكلوپەديانىڭ 3-تومى جارىق كورگەن بولاتىن.