استانادا «جاس سارباز» ۇيىمىنىڭ ۇزدىك جاس تاربيەلەنۋشىلەرى انىقتالادى
استانا. KAZINFORM - استانادا «جاس سارباز» اسكەري-پاتريوتتىق كلۋبتارىنىڭ قاتىسۋىمەن پوليگوندىق جيىن سالتاناتتى تۇردە اشىلدى.
جيىن استاناداعى 68665-اسكەري ءبولىمىنىڭ بازاسىندا باستالدى. ءىس-شاراعا قارۋلى كۇشتەردىڭ ارداگەرلەرى، قورعانىس ىستەرى جونىندەگى دەپارتامەنتىنىڭ، جاستار ساياساتى ماسەلەلەرى باسقارماسىنىڭ باسشىلىعى، سونداي-اق اسكەري ءبولىم كومانديرلەرى مەن «جاس سارباز» قوزعالىسىنىڭ وكىلدەرى قاتىستى.
ىرىكتەۋ بىرنەشە كۇنگە جالعاسادى. ناتيجەسىندە استانانىڭ اتىنان اقتوبە قالاسىندا وتەتىن x حالىقارالىق اسكەري-پاتريوتتىق جاستار جيىنىنا قاتىساتىن وكىلدەر تاڭدالىپ الىنادى.
- بيىل ۇلى جەڭىستىڭ 80 جىلدىعى مەن ءاليا مولداعۇلوۆانىڭ تۋعانىنا 100 جىل تولۋىنا وراي، اقتوبە وبلىسىندا حالىقارالىق «ايبىن» اسكەري-پاتريوتتىق جاستار جيىنى وتەدى. بايقاۋ ناتيجەسىندە استانانىڭ اتىنان قاتىساتىن ەڭ ۇزدىك 4 كوماندا انىقتالادى. بۇگىن باستاۋ العان «جاس سارباز - جەڭىس رۋحىنىڭ جالعاسى» جوباسى اياسىندا ءۇش كۇندىك اسكەري-پاتريوتتىق پوليگوندىق جيىن وتەدى. جاستار بەلتەمىرگە تارتىلۋ، اۆتومات جيناۋ، ارقان تارتۋ، سونداي-اق «سمارت سارباز» زياتكەرلىك ويىندارى سەكىلدى سايىستاردا باق سىنايدى. 150 قاتىسۋشىنىڭ ىشىنەن 75 ۇزدىگىن ىرىكتەپ الامىز، - دەدى «جاس سارباز» اسكەري-پاتريوتتىق جاستار قوزعالىسىنىڭ ەلوردالىق فيليالىنىڭ ءتوراعاسى اسحات نالشىبەك.
ءىس-شارا بارىسىندا قارۋلى كۇشتەرىنىڭ ارداگەرى، گەنەرال-مايور مارات ناعىمانوۆ، استانا قالاسى جاستار ساياساتى ماسەلەلەرى باسقارماسىنىڭ باسشىسى سامات يبرايەۆ جانە رەسپۋبليكالىق «جاس سارباز» قوزعالىسىنىڭ ءتوراعاسى مەيىربەك مەندىعاليەۆ قاتىسۋشىلارعا اقجول تىلەپ، ءسوز سويلەدى.
رەسمي ءبولىم كونتسەرتتىك باعدارلامامەن جالعاستى. جينالعاندارعا قارۋلى كۇشتەرىنىڭ ۇلتتىق اسكەري- پاتريوتتىق ورتالىعىنىڭ انشىلەرى مەن وركەسترى، قازاق ەستراداسىنىڭ جۇلدىزى يبراگيم ەسكەندىر، قۇرمەتتى قاراۋىل روتاسى جانە «جاس سارباز» ستۋدياسىنىڭ ارتىستەرى ونەر كورسەتتى.
ءىس-شارا سوڭىندا قاتىسۋشىلار اسكەري تەحنيكانىڭ كورمەسىن تاماشالاپ، اسكەري بولىممەن تانىسۋ ەكسكۋرسياسىنا قاتىستى.
ايتا كەتەلىك ۇلتتىق ۇلانعا 7000 جاس سارباز شاقىرىلاتىنى تۋرالى جازعان ەدىك.
