استانادا فاريزا وڭعارسىنوۆانىڭ 85 جىلدىعىنا ارنالعان دوڭگەلەك ۇستەل ءوتتى
ەلورداداعى 77№ مەكتەپ-گيمنازياسىندا قازاقتىڭ كورنەكتى اقىنى، ق ر حالىق جازۋشىسى، قوعام قايراتكەرى فاريزا وڭعارسىنوۆانىڭ 85 جىلدىعىنا وراي دوڭگەلەك ۇستەل ءوتتى.
بۇل تۋرالى ەلوردا اكىمدىگىنىڭ رەسمي سايتى حابارلادى.
فاريزا وڭعارسىنوۆا كەڭىنەن تارالعان تالاي شىعارمانىڭ اۆتورى رەتىندە وقىرماننىڭ ەسىندە ماڭگى ساقتالادى. ونىڭ وتتى ولەڭدەرى، وچەركتەرى، اڭگىمەلەرى، پوۆەستەرى ەلىمىزدە عانا ەمەس، شەتەلدەردە دە تانىمالدىلىققا يە بولدى.
مەرەيتويعا ارنالعان ءىس-شاراعا اقىننىڭ جاقىن تۋىستارى، كورنەكتى مەملەكەت قايراتكەرلەرى، اكادەميكتەر، عالىمدار، سونداي-اق مەكتەپ وقۋشىلارىنىڭ اتا-انالارى قاتىستى.
ءىس-شارا بارىسىندا اقىننىڭ ءوز ەلىنىڭ ادال پاتريوتى، جوعارى بىلىكتى اۋدارماشى، تالانتتى پۋبليتسيست بولعانى تۋرالى ەستەلىك اڭگىمەلەر ايتىلدى.
ەڭبەك جولىن اۋىل مەكتەبىندە قازاق ءتىلى مەن ادەبيەتى ءپانى مۇعالىمى بولىپ باستاپ، سودان كەيىن وبلىستىق گازەتتە جۋرناليست بولعان، العاشقى وتكىر ماقالالارى قوعامدى وزىنە نازار اۋدارۋعا ءماجبۇر ەتكەن قىز قازاق پوەتيكالىق كلاسسيكاسىنىڭ ۇزدىك داستۇرلەرىن جالعاستىرعان، قازاق پوەزياسىنداعى بىرەگەي قۇبىلىس، ەشكىمگە ۇقسامايتىن اقىن بولدى.
فاريزا اپا ءسوز الەمىندە قايتالانباس ءىز قالدىرىپ، قازاقستاندىق باسپا باسىلىمدارىنا وزىندىك ۇلەسىن قوستى. وكىنىشكە قاراي كوپتەگەن اتا-انالار مەن بالالار مۇنداي گازەتتەر مەن جۋرنالداردىڭ بار ەكەنىن بىلمەيدى. اعىمداعى دۇنيەلەر كوپ ۇزاماي ۇمىت بولادى.
ءبىراق كلاسسيكا، سونىڭ ىشىندە باسپا ءسوز ماڭگىلىك جاساي بەرەدى. فاريزا وڭعارسىنوۆانىڭ ۇلى شىعارماشىلىق جولى دا وسى باسپا سوزدەن باستالدى، - دەدى فيلولوگ، ادەبيەت تاريحشىسى، الاشتانۋشى ديحان قامزابەك ۇلى.
مۇقاعالي ماقاتايەۆتىڭ «فاريزا، فاريزا جان، فاريزا قىز» دەگەن ولەڭ جولدارى فاريزا وڭعارسىنوۆاداي اقىن، قازاقتىڭ قايسار قىزى، بولمىسى بولەك ايەل بەينەسىن ءدال ايشىقتاپ تۇرعانداي.
ءىس-شارادا وقۋشىلار اقىننىڭ ولەڭدەرىن وقىپ، اڭگىمەلەرىن ساحنالادى.
تانىمدىق كەش سوڭىندا مەكتەپ وقۋشىلارى مەن قوناقتار ەستەلىك فوتوسۋرەتكە ءتۇستى.
