استانادا شەتەلدىك ەڭبەك ميگرانتتارىنا بولىنەتىن كۆوتا ازايادى
استانا. KAZINFORM- سوڭعى 5 جىلدا استاناعا كەلەتىن شەتەلدىك ەڭبەك ميگرانتتارى سانىن ازايتىپ جاتىر. ونىڭ سەبەبىن ەڭبەك جانە حالىقتى الەۋمەتتىك قورعاۋ مينيسترلىگى كوشى- قون كوميتەتىنىڭ ءتوراعاسى اسقاربەك ەرتايەۆ ايتتى.
«استاناعا شەتەل جۇمىسشىلارى كۆوتا اياسىندا كەلەدى. ونى جەرگىلىكتى اتقارۋشى ورگان ورناتۆپ، رەتتەيدى. كوشى-قون اعىنى باقىلاۋدا. استاناعا كەلگەن بارلىق ەڭبەك ميگرانتتارى كۆوتا بويىنشا رەتتەلەدى. سوڭعى 5 جىلدا ءبىز استاناعا كەلەتىن شەتەلدىك ميگرانتتار سانىن ازايتىپ جاتىرمىز. بۇل ىشكى جۇمىس كۇشىن قورعاپ، قولداۋ ءۇشىن جاسالادى. ەلورداعا كوشى-قون بويىنشا قانداي دا ءبىر شەكتەۋلەر ەنگىزۋدى قاجەت دەپ سانامايمىن. ءوز ازاماتتارىمىزدا ەمىن-ەركىن كوشىپ، ەلورداعا كەلىپ، ەڭبەك ەتە الادى،-دەدى اسقاربەك ەرتايەۆ ورتالىق كوممۋنيكاتسيالار قىزمەتى الاڭىندا وتكەن باسپا ءسوز ءماسليحاتىندا.
ونىڭ ايتۋىنشا، استاناعا كەلگەن شەتەل ازاماتتارىنىڭ دەنى قۇرىلىس سالاسىندا جۇمىس ىستەيدى. ەلىمىز بويىنشا قۇرىلىس سالاسىندا 10359 ۆاكانسيا، ال ەلوردادا 73 بوس جۇمىس ورنى بار.
ايتا كەتسەك، كەشە قالالىق ءماسليحات وتىرىسىندا استاناعا كىرەبەرىس بەكەتتەردە بلوكپوستتار ورناتۋ ماسەلەسى قاراستىرىلىپ جاتقانى ايتىلعان ەدى.
«قالاعا كىرەبەرىس جەرلەردە بلوكپوستتار قويۋ ماسەلەسى قارالىپ جاتىر. بۇل ماسەلە ىشكى ىستەر ءمينيسترىنىڭ الدىندا ايتىلدى، ۆەدومستۆو باسشىسى كەلىسەدى دەپ ويلايمىن»، - دەدى استانا قالالىق پوليتسيا دەپارتامەنتى كوشى-قون باسقارماسىنىڭ باستىعى ەربول ماحمەتوۆ ساۋالعا.
