استانادا شەكاراشىلارعا ارنالعان مۋرال اشىلدى
استانا. KAZINFORM - ەلوردانىڭ سارىارقا اۋدانىندا شەكاراشىلار كۇنىنە وراي س. سەيفۋللين كوشەسىندە سالتاناتتى تۇردە مۋرال اشىلدى، دەپ حابارلايدى استانا اكىمدىگىنىڭ رەسمي سايتى.
مۋرالدىڭ بيىكتىگى 18 مەتردى قۇرايدى، وندا شەكارا قىزمەتىنىڭ بەلگىلەرى كورىنىس تاپقان. ونىڭ كومپوزيتسياسىندا ەل شەتىندەگى قاۋىپسىزدىكتى قامتاماسىز ەتەتىن شەكاراشىلاردىڭ ماڭىزدىلىعىن بىلدىرەتىن اۋە جانە تەڭىز كەمەلەرى ۇيلەسىمدى بەينەلەنگەن.
اشىلۋ سالتاناتىنا قازاقستان رەسپۋبليكاسى شەكارا قىزمەتىنىڭ ارداگەرلەرى مەن باسشىلىعى، سونداي-اق سارىارقا اۋدانى اكىمدىگىنىڭ وكىلدەرى قاتىستى.
جيىندا «استانا» شەكارالىق باقىلاۋ باسقارماسىنىڭ باستىعى پولكوۆنيك ماقسات احمەتقاليەۆ قۇتتىقتاۋ ءسوز سويلەدى.
«قازىرگى شەكاراشىلار زاماناۋي قارۋ-جاراقپەن، تەحنولوگيامەن قارۋلانعان، ءبىراق ولاردىڭ جۇمىسىندا ەڭ باستىسى - پاتريوتيزم مەن باتىلدىق. ءبىز بۇل قيىن ماماندىقتى تاڭداپ، وسى جولدا وتانىمىزعا، ونىڭ مەملەكەتتىك شەكارالارىن قورعاۋدا ابىرويمەن قىزمەت ەتۋىمىز كەرەك. مەرەكە قۇتتى بولسىن، شەكاراشىلار مەن شەكارا قىزمەتىنىڭ ارداگەرلەرى!» - دەدى پولكوۆنيك ماقسات احمەتقاليەۆ.
