استانادا دزيۋدودان الەمدىك Qazaqstan Barysy Grand Slam تۋرنيرى وتەدى
استانا. KAZINFORM - ەلوردادا 9-مامىر كۇنى دزيۋدودان الەمدىك رەيتينگىلىك Qazaqstan Barysy Grand Slam تۋرنيرى باستالادى.
ءۇش كۇنگە سوزىلاتىن بايراقتى دودانى ەلىمىز بيىل ءۇشىنشى رەت ۇيىمداستىرعالى وتىر.
قازاقستان دزيۋدو فەدەراتسياسىنىڭ باسپا ءسوز قىزمەتىنەن ءمالىم ەتكەنىندەي، الەمنىڭ كىل مىقتىلارىن جينايتىن بۇل باسەكە جاقسىلىق ۇشكەمپىروۆ اتىنداعى جەكپە-جەك سارايىندا وتەدى.
اتالمىش جارىس ناتيجەسىندە IJF ەرەجەلەرىنە سايكەس جارىستىڭ جەڭىمپازدارى مەن جۇلدەگەرلەرى اراسىندا الەمدىك جانە وليمپيادالىق رەيتينگىلەردە ۇپايلار بولىنەدى. اتاپ ايتقاندا، 1-ورىن ءۇشىن - 1 مىڭ، كۇمىس جۇلدەگەرگە – 700، ال قولا مەدال العانعا 500 ۇپاي ەسەپتەلەدى.
قازاقستان دزيۋدو فەدەراتسياسى مەن حالىقارالىق دزيۋدو فەدەراتسياسىنىڭ (IJF) ەكىجاقتى كەلىسىمشارتىنا سايكەس قازاقستان الەمدىك Grand Slam جارىسىن 2026-جىلعا دەيىن قابىلدايدى.
Qazaqstan Barysy Grand Slam الەمدىك جارىسى Qazsport تەلەارناسىنان تىكەلەي ەفيردە كورسەتىلەدى.
ەسكە سالا كەتەيىك، بۇدان بۇرىن ءمولدىر جاڭبىربايدىڭ كاراتەدەن مىسىرداعى تۋرنيردىڭ چەمپيونى اتانعانىن جازعان ەدىك.
