استانادا دۇكەننەن 14 تەلەفون ۇرلاعان ادام ۇستالدى

استانا. KAZINFORM - استانادا دۇكەننەن 14 دانا تەلەفون ۇرلاعان كۇدىكتى قۇرىقتالدى، - دەپ حابارلايدى Polisia.kz سايتى.

كۇندىزگى ۋاقىتتا ەر ادام تەلەفون ساتاتىن دۇكەندى كوزدەپ كەتىپ، قىلمىستىق ويىن تۇندە جۇزەگە اسىرماقشى بولعان. «سەرگەك» كامەرالارىنان جاسىرىنباق بولعان كۇدىكتى تاسجولدا جورعالاپ، دۇكەنگە تەرەزەسى ارقىلى كىرگەن.

دۇكەنگە دەيىن جەتىپ جىگىت تەرەزەنى بۇزىپ، ىشكە كىرەدى. بىرنەشە سەكۋند ىشىندە ول جالپى سانى 14 دانا Iphone تەلەفونىنىڭ ءارتۇرلى مودەلدەرىن يەمدەنگەن. ول ءتىپتى سوعىلعان دابىلدان دا قورىقپاعان. كۇزەت فيرماسىنىڭ قىزمەتكەرلەرى كەلگەنگە دەيىن كۇدىكتى سىرتقا شىعىپ، قاشىپ ۇلگەرگەن. جالپى كەلتىرىلگەن شىعىن 10 ميلليون تەڭگە دەپ باعالانىپ وتىر. ول ۇرلانعان گادجەتتەردى تاراز قالاسىندا لومباردقا وتكىزگەن، قالعانىن ەلوردادا ساتىپ الۋشىلارعا ساتىپ جىبەرگەن.

جەدەل-ىزدەستىرۋ ءىس-شارالارىن وتكىزۋ بارىسىندا ەسىل اۋدانى پ ب كريمينالدىق پوليتسيا قىزمەتكەرلەرى كۇدىكتىنى انىقتادى. ول بۇرىن بىرنەشە رەت سوتتالعان ەلوردانىڭ 21 جاستاعى تۇرعىنى بولىپ شىقتى. بۇل فاكتى بويىنشا قىلمىستىق ءىس قوزعالدى، ونىڭ قالا اۋماعىندا جاسالعان باسقا دا وسىعان ۇقساس قىلمىستارعا قاتىسى بار-جوعى تەكسەرىلىپ جاتىر.