استانادا پەداگوگتارعا ارنالعان تامىز كونفەرەنسياسى ءوتتى
استانا. KAZINFORM - استانا قالاسىنىڭ اكىمى جەڭىس قاسىمبەك Instagram پاراقشاسىندا تامىز كونفەرەنسياسىندا كوتەرىلگەن ماسەلەلەر تۋرالى جازدى. بۇل تۋرالى ەلوردا اكىمدىگىنىڭ رەسمي سايتى حابارلادى.
«جاڭا وقۋ جىلىنىڭ باستالۋىنا ەكى اپتاداي ۋاقىت قالدى. ءبىرىنشى سىنىپقا باراتىن وقۋشىلار ءۇشىن ومىرىندەگى جاڭا ءارى جاۋاپتى كەزەڭ باستالادى، ال جوعارى سىنىپ وقۋشىلارى ءۇشىن - بولاشاق ماماندىعىن انىقتايتىن ۋاقىت. ۇستازدارىمىز بالالارىمىزعا ءبىلىم بەرىپ قانا قويماي، ولاردىڭ الەۋەتىن اشۋعا، بويىنداعى ەرەكشە قاسيەتتەرىن تانىتۋعا كومەكتەسەدى. بۇگىن ءداستۇرلى 2024 تامىز فورۋمى ءوتىپ، نەگىزگى باعىتتار تالقىلاندى»، - دەپ جازدى جەڭىس قاسىمبەك.
اكىمنىڭ ايتۋىنشا، ءبىرىنشى ءبىلىم وشاقتارىنا باسا نازار اۋدارىلىپ وتىر.
«قالا تۇرعىندارىنىڭ جىل سايىنعى ءوسىمىن ەسكەرە وتىرىپ، ەلوردادا مەكتەپتەر كوپتەپ سالىنىپ جاتىر. قازىرگى ۋاقىتتا ەكى اۋىسىمدا 100 مىڭعا جۋىق وقۋشىعا ارنالعان 30 دان استام مەكتەپتىڭ قۇرىلىسى ءجۇرىپ جاتىر. جاڭا وقۋ جىلى ىشىندە 20 دان استام مەكتەپ اشامىز. ولاردىڭ ءبىر بولىگى - جايلى مەكتەپتەر. مەملەكەت باسشىسىنىڭ تاپسىرماسى بويىنشا «جايلى مەكتەپ» ۇلتتىق جوباسى اياسىندا Samruk-Kazyna Construction 90 مىڭ وقۋشى ورنىنا ارنالعان 24 جايلى مەكتەپ (2024-2025-جىلدار ارالىعىندا) سالادى»، - دەپ جازدى قالا اكىمى.
جەڭىس قاسىمبەكتىڭ جازۋىنشا، بۇدان وزگە مەملەكەتتىك بالاباقشالاردىڭ قۇرىلىسى قايتا جانداندى، بۇعان قوسا جەكە بالاباقشالارعا مەملەكەتتىك تاپسىرىس بەرۋ ارى قاراي جالعاسادى.
ەكىنشى. كادرلار دايارلاۋ
جىل سايىن ءبىز كوللەدجدەرگە دە، جوعارى وقۋ ورىندارىنا دا گرانتتار بولەمىز. بيىل ج و و- عا 850 گە جۋىق گرانت بولدىك. سونداي-اق، پەداگوگتارىمىزدى بىلىكتىلىگىن ارتتىرۋعا جىبەرەمىز.
ءۇشىنشى. الەۋمەتتىك كومەك
جالپىعا بىردەي وقىتۋ اياسىندا 12 مىڭنان استام وقۋشى كومەك الدى. ال ماتەريالدىق كومەك مولشەرى 43 مىڭ تەڭگەدەن اسادى. سونىمەن قاتار، مەكتەپ كيىمىن ساتىپ الۋعا ارنالعان وزگە دە باعدارلامالار بار، ونىڭ ىشىندە دەمەۋشىلىك قاراجات تا تارتىلادى.
ءتورتىنشى. ستۋدەنتتىك جاتاقحانالار
«جاۋاپتى مينيسترلىكپەن، ۋنيۆەرسيتەتتەرمەن، ينۆەستورلارمەن بىرلەسىپ، جاتاقحانالاردا ورىن سانىن ارتتىرۋ بويىنشا جۇمىس ىستەيمىز. بيىل استانادا 4,5 مىڭ ورىنعا ارنالعان 6 ستۋدەنتتىك جاتاقحانا سالىنادى. تاعى 4 ۋنيۆەرسيتەتكە جاتاقحانا سالۋ ءۇشىن جەر تەلىمدەرى ءبولىندى. 2025-جىلى تاعى 2 جاتاقحانانى پايدالانۋعا بەرۋ جوسپارلانىپ وتىر. وسى شارالاردىڭ بارلىعى وقۋشىلارىمىز بەن ۇستازدارىمىزدى قولداۋعا باعىتتالعان. ءبىز ءتيىستى جاعداي جاساۋ بويىنشا ارى قاراي دا جۇمىس ىستەيمىز»، - دەپ جازدى جەڭىس قاسىمبەك.
