استانادا ءورت قاۋىپسىزدىگىن ساقتاۋ جونىندە تۇسىندىرمە جۇمىستارى جۇرگىزىلدى
ەلوردادا ءورت قاۋىپسىزدىگى ەرەجەلەرىن ساقتاۋ بويىنشا جەدەل الدىن الۋ ءىس-شاراسى ءوتتى، دەپ حابارلايدى Kazinform قالا اكىمدىگىنىڭ رەسمي سايتىنا سىلتەمە جاساپ.
قالالىق توتەنشە جاعدايلار دەپارتامەنتى مەن پوليتسيا دەپارتامەنتى بىرلەسىپ وتكىزگەن بۇل ارناۋلى تەكسەرۋ جۇمىسىنا «Amanat» پارتياسىنىڭ «جاستار رۋحى» قاناتىنىڭ ەرىكتىلەرى دە قاتىستى. ولار 4 توپقا ءبولىنىپ الماتى اۋدانىنداعى قوناقۇيلەردىڭ، جاتاقحانالاردىڭ ءورت قاۋىپسىزدىگىن، توسىن جاعدايلارعا توتەپ بەرۋ دايىندىعىن تەكسەردى.
تەكسەرۋ بارىسىندا ءورت قاۋىپسىزدىگىنە نەمقۇرايدى قارعان كاسىپكەرلەرگە ەسكەرتۋ جاسالىپ، ءتۇسىندىرۋ جۇرگىزىلدى. ورتتەن ساقتانۋ جايلى جادىنامالار تاراتىلىپ، توسىن جاعدايلاردىڭ الدىن الۋ شارالارى ءتۇسىندىرىلدى.
استانادا ءورت قاۋىپسىزدىگىن ساقتاۋ بويىنشا ءتۇسىندىرۋ جۇمىسى ۇدايى جۇرگىزىپ كەلەدى. بيىل تامىز ايىنان بەرى ءورت قاۋىپسىزىدىگىن ساقتاۋ قىزمەتكەرلەرى 31 مىڭنان اساتام تۇرىعىن ءۇيدى ارالاپ، ءتىلسىز جاۋدىڭ الدىن الۋعا قاتىستى تۇسىندىرمە جۇمىستارىن وتكىزگەن.
«بيىل جىل باسىنان بەرى استانادا 549 ءورت كەتۋ وقيعاسى تىركەلدى. وتكەن جىلدارمەن سالىستىرعاندا ءورت وقيعالارى ازايعانى بايقالادى. دەگەنمەن تۇرعىندار دا، كاسىپكەرلەر دە بارلىق قاۋىپسىزدىك ەرەجەلەرىن ساقتاۋى كەرەك.
ادامداردىڭ ءومىرى مەن دەنساۋلىعىنا ەشتەڭە قاۋىپ توندىرمەۋى كەرەك. بيىل باس قالادا تۇرعىن ءۇي اۋماقتارىندا 223 رەت ءورت وقيعاسى بولىپ، 12 ادام قازا تاۋىپ، 27 ادام جارالانعان، 38 ادام ىس-تۇتەكتەن زارداپ شەككەن. سوندىقتان جاتاقحانالار، شاعىن قوناقۇيلەر بولسىن، ەڭ الدىمەن، ءورت قاۋىپسىزدىگىن ساقتاۋعا ەرەكشە كوڭىل ءبولۋى كەرەك. ءورت بولا قالعان جاعدايدا بەلگى بەرەتىن دابىل جۇيەسىنىڭ بولۋى ايىرىقشا ماڭىزدى»، - دەدى استانا قالاسى توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسى باسشىسىنىڭ مىندەتىن اتقارۋشى ماديار مىرزاكەلديەۆ.
رەيد بارىسىندا الماتى اۋدانىنداعى 20 شاعىن قوناقۇيگە تەكسەرۋ جۇرگىزىلدى.
توتەنشە جاعدايلار دەپارتامەنتىنىڭ دەرەگى بويىنشا، بۇگىندە استانا قالاسى بويىنشا رەسمي تۇردە 229 قوناق ءۇي مەن 80 حوستەل جۇمىس ىستەيدى.
قالالىق توتەنشە جاعدايلار دەپارتامەنتى مەن پوليتسيا دەپارتامەنتى الداعى ۋاقىتتا وسى ورىنداردا ءورت قاۋىپسىزدىگىن ساقتاۋ بويىنشا ءتۇسىندىرۋ جۇرگىزەدى. اۋلا ارالاۋ كەزىندە پوليتسيا وكىلدەرى مەن توتەنشە جاعداي قىزمەتىنىڭ ماماندارى جاتاقحانا جانە باسقا دا كوممەرتسيالىق قىزمەت ءۇشىن پايدالانىلاتىن تۇرعىن ۇيلەرگە ەرەكشە نازار اۋداردى.
