استانادا Chia Tai Pharmaceutical قارجى پيراميداسىنىڭ باسشىسى سوتتالدى
استانا. KAZINFORM - استانادا قارجى پيراميداسىنىڭ باسشىسى سوتتالدى.
استانا قالاسىنىڭ قىلمىستىق ىستەر جونىندەگى اۋدانارالىق سوتى قارجى پيراميداسىنىڭ قۇرىلىمدىق بولىمشەسىنە اسا ءىرى مولشەردە قاراجات تارتا وتىرىپ باسشىلىق جاساعانى ءۇشىن (ق ك 217-بابىنىڭ 3-بولىگىنىڭ 2-تارماقشاسى) ش. -عا قاتىستى ۇكىم شىعاردى.
ش. استانا قالاسىنىڭ اۋماعىندا Chia Tai Pharmaceutical قارجى پيراميداسىنىڭ قۇرىلىمدىق بولىمشەسىن باسقارىپ، 2022-2023-جىلدار ارالىعىندا قىتايعا فارماتسيەۆتيكالىق پرەپاراتتارى بار مەديتسينالىق قۇرىلعىلاردى وندىرۋمەن جانە ەكسپورتتاۋمەن اينالىساتىن فارماتسيەۆتيكالىق زاۋىتتىڭ قىزمەتىنە باعىتتالعان زاڭدى ينۆەستيتسيالاۋ تۇرىندەگى سالىمشىلاردىڭ قاراجاتىن زاڭسىز تارتۋدى، قوسىمشا زاۋىتتار سالۋدى جانە بيولوگيالىق تۇرعىدان بەلسەندى قوسپالاردى جەتىلدىرۋدى جۇزەگە اسىردى.
بۇل رەتتە قاراجاتتى باسقا ادامداردىڭ جارنالارى ەسەبىنەن بايىتا وتىرىپ، قايتا ءبولۋ ورىن العان.
قىلمىستىق ارەكەتتىڭ ناتيجەسىندە، ش. 12 جابىرلەنۋشىگە 29278762 تەڭگە سوماسىندا ماتەريالدىق شىعىن كەلتىرگەن. سوتتالۋشىنىڭ كىناسى كۋالەردىڭ ايعاقتارىمەن، ماماننىڭ قورىتىندىلارىمەن دالەلدەندى.
تاراپتاردىڭ ۇستانىمى
پروكۋرور 6 جىلعا باس بوستاندىعىنان ايىرۋدى سۇرادى. 7 جابىرلەنۋشى باس بوستاندىعىنان ايىرۋعا بايلانىستى ەمەس جازا، ال قالعان 5 جابىرلەنۋشى جازا تاعايىنداۋدى سوتتىڭ قاراۋىنا قالدىرۋدى سۇرادى. ادۆوكات پەن سوتتالۋشى باس بوستاندىعىنان ايىرۋعا بايلانىستى ەمەس ۇكىم شىعارۋدى سۇرادى.
سوت ۇكىمى
ق ك- ءنىڭ 217-بابى 3-بولىگى 2-تارماقشاسىنىڭ سانكسياسىمەن مۇلكى تاركىلەنىپ، سونداي-اق بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان 7 جىلعا دەيىنگى مەرزىمگە ايىرا وتىرىپ، 5 جىلدان 12 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازانى كوزدەيدى.
سوتتالۋشىنىڭ شىن جۇرەكتەن وكىنۋى، قىلمىستىق جاۋاپتىلىققا ءبىرىنشى رەت تارتىلۋى جاۋاپكەرشىلىك پەن جازانى جەڭىلدەتەتىن ءمان-جايلار دەپ تانىلدى.
اۋىرلاتاتىن ءمان-جايلار انىقتالمادى.
سوت جابىرلەنۋشىلەرگە قىلمىسپەن كەلتىرىلگەن ماتەريالدىق زياندى وتەمەۋدى، سونداي-اق جەڭىلدەتەتىن ءمان-جايلاردى جانە ق ك- ءنىڭ 55-بابى 2-بولىگىنىڭ 2-تارماعىن ەسكەرە وتىرىپ، ق ك- ءنىڭ 217-بابى 3-بولىگىنىڭ 2-تارماقشاسى بويىنشا ش. -نى كىنالى دەپ تانىپ، وعان ازاماتتاردىڭ قاراجاتى مەن ينۆەستيتسيالارىن تارتۋعا بايلانىستى قىزمەتپەن اينالىسۋ قۇقىعىنان 5 جىلعا ايىرا وتىرىپ، 5 جىل مەرزىمگە باس بوستاندىعىنان ايىرۋ جازاسىن تاعايىندادى.
ۇكىم زاڭدى كۇشىنە ەنگەن جوق.
