استانادا بيىكتەن قۇلاپ كەتكەن تاعى ءبىر الپينيست قايتىس بولدى
ەلوردانىڭ دەنساۋلىق ساقتاۋ باسقارماسى كەشە قۇرىلىس الاڭىندا زارداپ شەككەن الپينيستەردىڭ جاي-كۇيىن باياندادى، دەپ حابارلايدى Kazinform.

12-قازان كۇنى استانالىق تۇرعىن ءۇي كەشەنىنىڭ قۇرىلىسىندا 4 الپينيست بيىكتەن قۇلاپ، بىرەۋى وقيعا ورنىندا كوز جۇمعان ەدى.
قالعان ۇشەۋى وقيعا ورنىنان №2-قالالىق اۋرۋحاناعا جەتكىزىلگەن.
ۇشەۋىنە دە جۇمساق ءتىن جاراقاتى، قابىرعالارىنىڭ، جامباس سۇيەكتەرىنىڭ سىنۋى، ىشكى اعزالاردىڭ جاراقاتى، جوعارى دارەجەلى شوك جانە تراۆماتيكالىق جاي-كۇي دياگنوزى قويىلعان.
زارداپ شەككەندەر بىردەن قارقىندى تەراپيا پالاتالارىنا ورنالاستىرىلعان، الىنعان جاراقاتتار بويىنشا جەدەل ەمدەۋ جۇرگىزىلگەن.
«الايدا كوپتەگەن جاراقات سالدارىنان ەكىنشى الپينيست - 1999 -جىلى تۋعان ەر ادام 12-قازان كۇنى 17.40-تا قايتىس بولدى. بۇگىنگى جاعداي بويىنشا 1999 جانە 2002 -جىلى تۋعان ەكى الپينيست رەانيماتسيا جانە قارقىندى تەراپيا بولىمىندە وتە اۋىر جاعدايدا جاتىر»، - دەپ حابارلادى باسقارما.
ءوز كەزەگىندە استانا اكىمدىگى دە جاعدايعا پىكىر ءبىلدىرىپ، «التىن بەسىك» تۇرعىن ءۇي كەشەنىندەگى بۇكىل قۇرىلىس-مونتاج جۇمىستارى توقتاعانىن ايتتى.
«قالالىق ورتا ساپاسى جانە باقىلاۋ باسقارماسى اتالعان اپاتتى تەكسەرۋ ءۇشىن كوميسسيا قۇردى. ناتيجەلەرى بويىنشا اپاتتىڭ سەبەپتەرى مەن جاۋاپتى تۇلعالار انىقتالادى. تەرگەۋ قورىتىندىسى بويىنشا ماتەريالدار پروتسەسسۋالدىق شەشىم قابىلداۋ ءۇشىن پوليتسيا دەپارتامەنتىنە جولدانادى»، - دەپ جازىلعان اكىمدىكتىڭ رەسمي جاۋابىندا.
اۆتور
ايجان سەرىكجان قىزى