استانادا بوتاي جىلقىسىنا ەسكەرتكىش ورناتىلىپ، اشىق اسپان استىندا مۋزەي قۇرىلۋى مۇمكىن
پەتروپاۆل. KAZINFORM - قولعا العاش جىلقى ۇيرەتىلگەن بوتاي مادەنيەتىن جانە ات سپورتىن ناسيحاتتاۋ ماقساتىندا استانا قالاسىندا ءبىرقاتار ءىس شارا قولعا الىنادى.
بۇگىن استانادا رەسپۋبليكالىق «JORYQ» ات سپورتى فەدەراتسياسىنىڭ پرەزيدەنتى باقىتجان تۇرلىبەكوۆ پەن استانا قالاسى ۇلتتىق جانە وليمپيادالىق ات سپورتى تۇرلەرى فەدەراتسياسىنىڭ پرەزيدەنتى ەرلان كاناليموۆ مەموراندۋمعا قول قويدى.
فەدەراتسيانىڭ باسپا ءسوز قىزمەتىنىڭ مالىمەتىنشە، 14 تارماقتان تۇراتىن مەموراندۋم ەكى فەدەراتسيا اراسىنداعى ارىپتەستىكتى، ىنتىماقتاستىقتى نىعايتۋدى جانە ات سپورتىن دامىتۋ مەن تانىمالدىعىن ارتتىرۋدى كوزدەگەن.
اتاپ ايتقاندا، تاراپتار بىرلەسە وتىرىپ ات سپورتىن ءتيىمدى دامىتۋعا باعىتتالعان باستامالارىنا قولداۋ كورسەتۋگە، قوستاناي جانە اداي جىلقىلارىنىڭ تۇقىمىن، جىلقى مالى قولعا العاش ۇيرەتىلگەن بوتاي مادەنيەتىن ناسيحاتتاۋ بارىسىندا بىرلەسكەن جۇمىس جۇرگىزۋگە ۋاعدالاستى.
ناتيجەسىندە استانا قالاسىنىڭ شاعىن ساياباقتارىنىڭ بىرىندە بوتاي جىلقىسىنا ەسكەرتكىش ورناتۋ جانە ساياباقتى سول تاقىرىپتا اباتتاندىرۋ مەن استانا قالاسىندا اشىق اسپان استىندا بوتاي مادەنيەتىنىڭ مۋزەيىن ۇيىمداستىرۋ بويىنشا بىرلەسىپ جۇمىس اتقارۋدى دا جوسپارلاپ وتىر.
سونىمەن قاتار ەكى فەدەراتسيا ات سپورتىنا ۇلەس قوسقان ازاماتتاردى جىل سايىن قوشەمەتتەۋ جانە ماراپاتتاۋ سالتاناتتى شاراسىن ۇيىمداستىرىپ، جوعارى وقۋ ورىندارىمەن بىرلەسكەن شارالار وتكىزبەكشى. بۇعان قوسا قازاق جىلقىسىن، ونىڭ قازاق تۇرمىسى مەن مادەنيەتىندەگى ورنىن ناسيحاتتاۋ جولىندا استانا قالاسىنداعى جاستار تەاترىندا ارنايى قويىلىم كورسەتۋ بويىنشا بىرلەسكەن جۇمىس تا قولعا الىنباق.
