استانادا «بولاشاق» تۇلەگىنە قاتىستى سوت وتىرىسى ءوتتى
استانا. KAZINFORM - استانا قالاسىنىڭ ازاماتتىق ىستەر جونىندەگى اۋدانارالىق سوتىندا «حالىقارالىق باعدارلامالار ورتالىعى» ا ق- نىڭ ماقپال دارىبايەۆا مەن ناتاليا ۆوروبيەۆادان قارىزدى ءوندىرۋ تۋرالى ارىزى بويىنشا سوت وتىرىسى ءوتتى.
ايتا كەتەيىك، ۆالەريا گاۆريلەنكو «بولاشاق» باعدارلاماسىمەن ۇلى بريتانياعا وقۋعا كەتىپ، سودان قايتقىسى جوق. وقۋ اقشاسىن تولىق تولەمەسە دە، كەپىلگە قويعان مۇلكىن شىعارىپ العان. ال حالىقارالىق باعدارلامالار ورتالىعى بولسا وقۋدىڭ اقشاسىن، ياعني 30 ميلليون تەڭگە مەملەكەت قارجىسىن گارانت بولعان ءۇشىنشى تاراپتان تالاپ ەتىپ وتىر.
ءۇشىنشى تاراپ دەپ وتىرعانىمىز ۆالەريا گاۆريلەنكوعا گارانت بولعان بۇرىنعى ارىپتەستەرى - ماقپال دارىبايەۆا مەن ناتاليا ۆوروبيەۆا. بەلگىلى بولعانداي، 2016 -جىلى «بولاشاق» ستيپەندياسىنىڭ يەگەرى اتانعان ۆ. گاۆريلەنكو «قىزدار، كومەكتەسىڭدەر! مەن 2 ءۇيىمدى كەپىلدىككە قويامىن، سەندەرگە ەشقانداي قاۋىپ تونبەيدى. مەن وقۋىمدى ءبىتىرىپ، ەلگە ورالامىن» دەپ ەكى ارىپتەسىن گارانت بولۋعا كوندىرگەن. وسىلايشا، ارىپتەستەرى كەپىلگە جەتپەي تۇرعان 6 ميلليون تەڭگەگە گارانت بولعان.
ۆالەريا گاۆريلەنكو ءوزى كەپىلگە قويعان ەكى پاتەردى 2019 -جىلى شىعارىپ العان. سول ۋاقىتتان بەرى شەتەلدە تۇرىپ جاتىر. 2021 -جىلى «بولاشاق» ماقپال دارىبايەۆا مەن ناتاليا ۆوروبيەۆاعا سوت ارقىلى شاعىم تۇسىرگەن. حالىقارالىق باعدارلامالار ورتالىعى داۋدى مەدياتسيا تارتىبىمەن رەتتەۋ تۋرالى وتىنىشپەن جۇگىنگەن. نەگىزگى بورىشكەر ۆالەريا گاۆريلەنكونى دا تارتۋ بويىنشا ءوتىنىش بىلدىرگەن.
بۇگىنگى سوت وتىرىسىندا سۋديا داۋدىڭ مەدياتسيا تارتىبىمەن شەشىلۋى ءۇشىن سوت پروتسەسىن كەيىنگە قالدىردى. الايدا جاۋاپكەر ماقپال دارىبايەۆا دەنساۋلىعىنا بايلانىستى كەزەكتى سوت وتىرىسىنا قاتىسپاۋى مۇمكىن ەكەنىن ايتىپ، سوتتا ءسوز سويلەۋدى سۇرادى.
«2016 -جىلى كەپىلدىك كەلىسىمگە قول قويعان كەزدە گاۆريلەنكونىڭ 2 پاتەردى كەپىل رەتىندە تىركەگەنىن ءبىلدىم. سول ءۇشىن دە گارانت بولۋعا كەلىستىم. «بولاشاقتىڭ» ءبىزدىڭ ۇستىمىزدەن سوتقا بەرگەن شاعىمى نەگىزسىز دەپ ەسەپتەيمىن. ولار وزدەرى 2 پاتەردى زاڭسىز بەرىپ جىبەرگەن. ەندى بۇكىل قارىزدى ءبىزدىڭ موينىمىزعا ىلمەكشى. مينيستر ساياسات نۇربەك ايتقان كەلىسىم جوق دەپ ويلايمىز. ولار ءبىرجاقتى تۇردە قارىزدى بىزدەن ءوندىرىپ الماقشى. نەلىكتەن سوت بۇل ءىستى بىردە- ءبىر كەپىل بولماعانداي قاراستىرىپ وتىر؟ ادىلدىك قايدا؟ سوتتان تالاپتى قاناعاتتاندىرۋدان باس تارتۋدى تالاپ ەتەمىز»، - دەدى ول.
سوتتالۋشىلاردىڭ ادۆوكاتى ايجان الينا نەسيە بەرۋشىنىڭ كىنالى ەكەنىن العا تارتىپ وتىر.
«حالىقارالىق باعدارلامالار ورتالىعى باسشىسىنىڭ كەپىلگە قويىلعان مۇلىكتى كەپىلدەن بوساتۋعا قول قويعانىن كورىپ وتىرمىز. پاتەرلەر كەپىلدەن شىعارىلىپ، باسقا ادامداردىڭ اتىنا اۋدارىلعان. قازىر ول ۇيدە گاۆريلەنكونىڭ اناسى تۇرىپ جاتىر دەگەن اقپارات بار. كرەديتوردىڭ ءوزى زاڭسىز ارەكەتتەرىنەن كەپىلسىز قالىپ وتىر. ەگەر كەپىل زاتتان ايىرىلماسا، گارانت بولعان جاندار سوت زالىندا كوز جاسىن ءسۇرتىپ وتىرماس تا ەدى»، - دەدى ايجان الينا.
ادۆوكاتتىڭ ايتۋىنشا، كەپىلدىك تۋرالى شارت بويىنشا جانە كەپىلدىك تۋرالى ازاماتتىق كودەكستىڭ ەرەجەسىنە سايكەس كەپىلگەرلەر نەگىزگى بورىشكەر مىندەتىن ورىنداعانعا دەيىن جاۋاپتى بولادى.
«ءبىراق كەپىلدىك شارتى وقىتۋدى ۇيىمداستىرۋ تۋرالى شارتقا بايلانىستى. 2022 -جىلى بۇل مىندەتتەمەلەر شارتتان سوت شەشىمىنە اۋىسقاندىقتان، شارت ءوز كۇشىن توقتاتتى. ەندى گاۆريلەنكونىڭ مىندەتتەمەسى شارتتان ەمەس، سوتتىڭ شەشىمىنەن تۋىندايدى، ال كەپىلدىك شارتى وقىتۋ شارتىنىڭ ورىندالۋىن قامتاماسىز ەتتى. مەنىڭ ويىمشا جانە وسىنداي سوت شەشىمدەرىن شىعارعان ادام رەتىندە ايتارىم، قازىر كەپىلدىك بەرۋشىلەرگە تالاپ قويۋ مۇمكىن ەمەس»، - دەدى ول.
ەكىنشى جاۋاپكەر ناتاليا ۆوروبيەۆا گاۆريلەنكو بايلانىسقا شىعىپ، كەشىرىم سۇراۋ بىلاي تۇرسىن، ءوزىن بۇل باعدارلامانىڭ قۇربانى ەكەنىن ايتقان.
ەستەرىڭىزگە سالساق، بۇعان دەيىن عىلىم جانە جوعارى ءبىلىم ءمينيسترى ساياسات نۇربەك «بولاشاق» باعدارلاماسىنىڭ شارتىن بۇزعان تۇلەك تۋرالى پىكىر بىلدىرگەن بولاتىن.
