استانادا بالاڭىزدى تەگىن ۇيىرمەگە قالاي جازۋعا بولادى؟

 بالا - بولاشاق. ولاردىڭ ۋاقىتىن ءتيىمدى ۇيلەستىرىپ، ونەرگە باۋلۋ، سپورتپەن اينالىسۋعا ۇندەۋ ىزگى قوعام قالىپتاستىرۋدىڭ العىشارتى.

بالالاردىڭ قابىلەتىن تانىپ، قاناتىن قاتايتۋعا اتا- انامەن قاتار مەملەكەت تە مۇددەلى. پرەزيدەنت قاسىم- جومارت توقايەۆ مارتەبەلى قىزمەتكە كىرىسكەن العاشقى جىلى- اق «كىشكەنتاي تۇرعىنداردىڭ» تولىق ادام بولىپ ءوسۋى ءۇشىن ونەگەلى باستاما كوتەردى.

استانادا بالاڭىزدى تەگىن ۇيىرمەگە قالاي جازۋعا بولادى؟

«ۇلت دەنساۋلىعىن بەكەمدەۋ ماسەلەسى دە وتە وزەكتى. بارلىق جاس ساناتى اراسىندا بۇقارالىق سپورت تۇرلەرىن ناسيحاتتاي بەرۋ كەرەك. بالالار ءۇشىن سپورتتىق ينفراقۇرىلىمنىڭ بارىنشا قولجەتىمدى بولۋىن قامتاماسىز ەتۋ ماڭىزدى. بۇقارالىق سپورتتى دامىتۋ - پيراميداعا اينالۋى قاجەت. ونىڭ باسىنا چەمپيوندار شىقسا، ونىڭ نەگىزىندە ءبىز ساۋ ءارى سانالى ۇرپاقتى، مىقتى ۇلتتى قالىپتاستىرامىز. ولاردىڭ جارقىن بولاشاعى ءۇشىن ۇيىرمەلەردى ۇيلەستىرۋدى تاپسىرامىن»، دەگەن قاسىم- جومارت كەمەل ۇلى بۇقارالىق سپورتتى، ونەردى دامىتۋعا ارنالعان كەشەندى باعدارلاما قابىلداۋ ماسەلەسىن ايتقان بولاتىن.

حالىقتى سپورتقا تارتۋ، ۇلتتىق قۇندىلىقتاردىڭ قۇنىن قۇلدىراتپاي باعالاۋعا بەيىمدەۋ جانە ونى ميلليونداعان حالىق ءۇشىن قولجەتىمدى ەتۋ ماقساتىندا 2021 -جىلدىڭ 1-مامىرىنان باستاپ بۇكىل ەلدە مەملەكەتتىك سپورت پەن شىعارماشىلىق تاپسىرىستاردى جان باسىنا شاققانداعى قارجىلاندىرۋ تەتىگى ىسكە قوسىلدى.

بۇگىندە ەل تەرريتورياسىندا تۇتاس يگى باستاماعا اينالعان ميسسيانى باس قالانىڭ دەنە شىنىقتىرۋ جانە سپورت باسقارماسى دا ىسكە اسىرىپ وتىر.

مەگاپوليستەگى مىڭداعان بالانىڭ بەلىن بۋىپ، ۇيرەتەرى كوپ ۇيىرمەلەرگە تارتۋ ماسەلەسى شەشىمىن تاپقان. ىنتاسى بار كەز كەلگەن استانالىق تەگىن سپورتتىق، شىعارماشىلىق باعىتتاعى ۇيىرمەلەرگە قاتىسىپ شەبەرلىگىن شىڭداي الادى.

باس قالادا بۇل باعىتتا اتقارىلىپ وتىرعان شارالاردى استانا قالاسىنىڭ دەنە شىنىقتىرۋ جانە سپورت باسقارماسىنىڭ بۇقارالىق سپورت ءبولىمىنىڭ باسشىسى ازامات اگزاموۆتان سۇراپ، بىلدىك.

«2023 -جىلدىڭ قاڭتارىنا دەيىن مەملەكەتتىك شىعارماشىلىق جانە سپورتتىق تاپسىرىستى ىسكە اسىرۋ اrtsport.kz «SoftDeCo» ج ش س پلاتفورمادا جۇزەگە اسىرىلدى. 2023 -جىلعى 1 -قاڭتاردان باستاپ جەرگىلىكتى اتقارۋشى ورگاندارعا باعدارلامانى ىسكە اسىرۋ ءۇشىن پلاتفورمانى تاڭداۋ مۇمكىندىگى بويىنشا وكىلەتتىكتەر بەرىلدى. وتكىزىلگەن مەملەكەتتىك ساتىپ الۋ كونكۋرسىنىڭ ناتيجەلەرى بويىنشا 2023 -جىلعى مامىردان باستاپ مەملەكەتتىك سپورتتىق تاپسىرىستى ىسكە اسىرۋ damubala.kz. سايتى ارقىلى قولجەتىمدى»، دەدى ازامات اگزاموۆ.

استانالىق بۇلدىرشىندەر ءۇشىن شاھاردا سپورتتىڭ 30 ءتۇرى بويىنشا 945 سەكسيا جۇمىس ىستەيدى.

تۇرعىندار تاراپىنان ەڭ كوپ تاڭدالاتىن تانىمال سەكسيالار: شاحمات، دزيۋدو، فۋتبول جانە كوركەم گيمناستيكا.

«اكىمدىك 2024 -جىلعا مەملەكەتتىك سپورتتىق تاپسىرىستى ىسكە اسىرۋ ءۇشىن 26000 ۆاۋچەر اشتى. سونىمەن قاتار، بۇگىن، 29 - قاراشا، بالالاردى سپورت سەكسيالارىنا جازۋ ءۇشىن كەزەك اشىلدى. 30- قاراشا ساعات 00.00 دە كەزەككە تىركەلۋ اياقتالادى. تەگىن ۇيىرمەلەرگە تىركەلۋ تۋرالى تولىق اقپارات Damubala.kz سايتىندا قولجەتىمدى»، دەپ ءتۇسىندىردى ول.

ايتا كەتەيىك، DamuBala.kz 4 پەن 17 جاس ارالىعىنداعى بالالارعا ارنالعان جان باسىنا شاققاندا نورماتيۆتىك قارجىلاندىرۋ باعدارلاماسى بويىنشا ۇيىرمەلەردى ىزدەۋ جانە ولارعا جازىلۋعا ارنالعان پلاتفورما. جۇيەگە تىركەلۋ ارقىلى بالاڭىزدى ءوزىڭىزدىڭ تۇرعىلىقتى ورنىڭىزعا جاقىن جەردە ورنالاسقان سپورتتىق، شىعارماشىلىق باعىتتاعى تەگىن ۇيىرمەلەرگە ەركىن تىركەي الاسىز. پلاتفورما ارقىلى تىركەلۋ ءتورت ساتىدان تۇرادى. ءبىرىنشى باسقىشتا بالانى تىركەيسىز، ودان كەيىن قالاۋىڭىزداعى ۇيىرمەنى تاڭداپ، ساباققا جازىلاسىز. سوڭعى ساتىدا بالانى سەكسياعا تىركەۋ اياقتالعانىن باقىلاپ وتىرۋ كەرەك.

تەگىن ۇيىرمەگە تىركەلۋ بارىسىندا ЭЦП كىلتتىڭ بولۋى شارت. سونداي- اق تىركەلۋ بارىسىندا اتا- انانىڭ جەكە كۋالىگىنىڭ كوشىرمەسى مەن بالانىڭ تۋۋ تۋرالى قۇجاتى سۇرالادى.

«ۇيىرمە تاڭداردا بالانىڭ قىزىعۋشىلىعىن ەسكەرگەن ءجون. 4 جاس - بالانىڭ ءتىلى شىعىپ، ويىنداعىسىن ايتا الاتىن كەزەڭ. سوندىقتان اتا- انالاردى ءوز ارمانىن بالاعا تاڭۋدان اۋلاق بولۋعا شاقىرامىن. ۇيىرمەگە جازباس بۇرىن بالامەن سويلەسىپ، تىلەگىنە قۇلاق اسىپ، ءبىرشاما ۋاقىت باقىلاعان ابزال. ساباقتان تىس ۋاقىتتا بالاسىن ۇيىرمەلەرگە تاسيتىن اتا- انالاردى ءجيى كورەمىز. بۇل بالا جان- جاقتى تۇلعا بولىپ قالىپتاسۋى ءۇشىن ماڭىزدى بولعانمەن، شەكتەن تىس جۇكتەمە ارتۋ، بوس ۋاقىت قالدىرماۋدان ساقتانۋ كەرەك»، دەدى استانا قالالىق دەنە شىنىقتىرۋ جانە سپورت باسقارماسى بۇقارالىق سپورت ءبولىمىنىڭ باسشىسى.

ءبىلىمدى، تاربيەلى ءارى دەنى ساۋ ۇرپاق - ۇلتتىڭ ەڭ قىمبات بايلىعى. قۇرمەتتى اتا- انا، ۇرپاعىڭىزدىڭ بولاشاقتا ۇتىلماي، جاھاندانۋعا جۇتىلماي جەتىلۋى ءۇشىن دارىنىن دامىتىپ، تالابىن تانۋدى بۇگىننەن باستاڭىز!

دانا مىرزاقادىر

egemen.kz