استانادا ازاماتتاردى تىركەۋ بويىنشا شەكتەۋ ەنگىزىلۋى مۇمكىن

 استانا اكىمدىگى ەلوردادا كوشى- قون پروتسەسىن رەتتەۋ ءۇشىن قانداي شارالار قابىلداۋ قاجەتتىگىن تالقىلاۋدا. ازىرگە ازاماتتاردى تىركەۋ بويىنشا شەكتەۋلەر ەنگىزۋ ۇسىنىلىپ وتىر، دەپ حابارلايدى Kazinform.

«قازىر زاڭ جوباسى ازىرلەنىپ جاتىر، قوسىمشا تالقىلاۋ جۇرۋدە. ءبىز وسى قاعيدالار شەڭبەرىندە ازاماتتاردى تىركەۋ كەزىندە وتباسى مۇشەلەرىنىڭ جالپى سانىن قوسپاعاندا، ءار ادامعا 18 شارشى مەتردەن اسپاۋى كەرەك دەگەن نورمانى قاراستىردىق. ياعني تۇتاس وتباسى وسى پاتەرگە، تۇرعىن ۇيگە تولىق تىركەلەدى. وتباسىنان تىس ادامدار بولسا، وندا وتباسىنىڭ ءار مۇشەسىنە 18 شارشى مەتر ءبولۋ پروتسەسى جۇرەتىندەي ويلاستىردىق. دەگەنمەن ادىلەت ورگاندارى بۇل شارانى كونستيتۋتسياعا سايكەس كەلمەيدى دەپ ۇيعاردى جانە قابىلدامادى. قازىر ءبىز تىركەۋدى شەكتەۋ بويىنشا وسى پروتسەستى رەتتەۋ قۇقىعىن بەرۋ ءۇشىن جوعارىدا ايتقان زاڭنامالىق اكتىلەرگە وزگەرىستەر ەنگىزىپ جاتىرمىز»، - دەدى استانا قالاسىنىڭ جۇمىسپەن قامتۋ جانە الەۋمەتتىك قورعاۋ باسقارماسى باسشىسىنىڭ ورىنباسارى ەرلان ءجۇسىپوۆ قالانىڭ قوعامدىق كەڭەسىنىڭ وتىرىسىندا.

ەسكە سالا كەتسەك، بيىلعى شىلدە ايىندا پرەزيدەنت قاسىم- جومارت توقايەۆ ەلورداداعى كوشى- قون پروتسەستەرىن باقىلاۋعا الۋدى تاپسىرعان بولاتىن. مەملەكەت باسشىسى جىل سايىن استاناعا 50-60 مىڭ ادام كەلەتىنىن اتاپ ءوتتى.

«بۇدان بولەك، كۇن سايىن جاقىن ماڭداعى ەلدى مەكەندەردەن 150 مىڭ ادام كەلىپ كەتەدى. مۇنىڭ ءبارى ينجەنەرلىك جانە الەۋمەتتىك ينفراقۇرىلىمعا ايتارلىقتاي سالماق تۇسىرەدى. سول سەبەپتى، كوشى- قون ۇدەرىسىن ءتيىمدى رەتتەۋ قاجەت، ياعني، پارمەندى شارالار قابىلداۋ كەرەك. نەگىزىنەن، كوپ ادام قالاعا جاقىن جەرلەردەن جۇمىس ىستەۋگە كەلەدى. سوندىقتان بۇل سالانى ناقتى رەتتەپ، باقىلاۋ كۇشەيتىلۋگە ءتيىس»، - دەدى قاسىم- جومارت توقايەۆ.