استانادا ايەلدى ۇرعان دۇكەن ۇرلىقشىسى ۇستالدى

Фото: polisia.kz
Фото: polisia.kz

استانا. KAZINFORM - ەلوردالىق پوليتسەيلەر شاعىن دۇكەن توناۋشىسىن ۇستادى.

«ەلوردالىق پوليتسەيلەر تاڭەرتەڭ شاعىن ماركەتتەن ەنەرگەتيكالىق سۋسىن ۇرلاعان قالا تۇرعىنىن ۇستاپ، ۋاقىتشا ۇستاۋ يزولياتورىنا قامادى. ۇرىنى توقتاتۋعا ارەكەت جاساعان كۇزەتشىنى (ايەل) قاعىپ، پىشاقپەن قورقىتىپ، قاشىپ كەتكەن. سارىارقا اۋداندىق پوليتسيا باسقارماسىنىڭ كريمينالدىق پوليتسيا قىزمەتكەرلەرى دەرەۋ كۇدىكتىنىڭ ىزىنە ءتۇسىپ، بۇرىن ۇرلىق جاساعانى ءۇشىن سوتتالعان 27 جاستاعى جىگىتتى ۇستادى»، - دەلىنگەن حابارلامادا.

سونداي-اق، اقپاراتتا توناۋ فاكتىسى بويىنشا قىلمىستىق ءىس قوزعالعانى ايتىلعان.

«بۇزاقىنىڭ ەلوردادا جاسالعان وسىعان ۇقساس باسقا دا قىلمىستارعا قاتىسىنىڭ بار-جوعى انىقتالۋدا»، - دەيدى پوليتسيادان.

استانا قالاسى پوليتسيا دەپارتامەنتى ازاماتتاردى زاڭسىز ارەكەتتەرگە بارعان جاعدايدا دەرەۋ پوليتسياعا حابارلاسۋدى، قاۋىپسىزدىك ماقساتىندا قىلمىسكەرلەردى ۇستاۋعا ءوز بەتىنشە شارا قولدانباۋدى ەسكەرتەدى.

سوڭعى جاڭالىقتار