استانادا پاتەرىنە شەكتەن تىس ادام تىركەگەندەرگە 78,6 مىڭ تەڭگە ايىپپۇل سالىنادى

استانا. KAZINFORM - پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين استانادا پاتەرىنە شەكتەن تىس تۇرعىن تىركەگەندەرگە قانداي جازا قولدانىلاتىنىن ايتتى.

- ايىپپۇل بولادى. كولەمى مەن مەرزىمىن ءالى پىسىقتالىپ جاتىر. ءول ۇشىن اكىمشىلىك كودەكسكە ارنايى زاڭ كەرەك، - دەدى سەرىك جۇمانعارين.

ءمينيستردىڭ ورىنباسارى باۋىرجان وماربەكوۆ ونىڭ جاۋابىن تولىقتىردى.

- اكىمشىلىك قۇقىق بۇزۋ تۋرالى كودەكس بويىنشا، قازىر پاتەرىنە شەكتەن تىس تۇرعىنداردى تىركەگەن ازاماتتارعا 10 ايلىق ەسەپتى كورسەتكىش (39320 تەڭگە) ايىپپۇل كوزدەلگەن. ۇسىنىلىپ وتىرعان زاڭ جوباسىندا وسى سومانى ەكى ەسە كوتەرۋ، ياعني 20 ا ە ك (78640 تەڭگە) كولەمىندە جاۋاپكەرشىلىك جۇكتەلەتىنى ايتىلعان، - دەدى ول.

سونداي-اق، ول وسىنداي زاڭسىزدىقتارعا جول بەرگەن حالىققا قىزمەت كورسەتۋ ورتالىقتارىنىڭ ماماندارىنا قانداي جازا قولدانىلاتىنىن ءتۇسىندىردى.

- ولاردىڭ جاۋاپكەرشىلىگى باسقاشا بولادى. مىسالى، جالعان قۇجات جاساۋ ارەكەتتەرى انىقتالسا، قىلمىستىق جاۋاپكەرشىلىككە دە تارتىلۋى مۇمكىن، - دەدى ۆيتسە- مينيستر.

ايتا كەتۋ كەرەك، اتالعان زاڭ جوباسىندا استانادا ءبىر پاتەرگە تىركەلەتىن تۇرعىننىڭ سانى باسپانانىڭ شارشى مەترىنە قاراي شەكتەۋ كوزدەلگەن.