استانادا العاش يسلامدىق قارجىلاندىرۋ جانە بيزنەس فورۋمى ءوتىپ جاتىر
استانا. KAZINFORM - بۇگىندە ەلوردا تورىنە يسلامدىق قارجىلاندىرۋ سالاسىنىڭ ماماندارى مەن بيزنەس وكىلدەرى جينالدى.
- فورۋم اياسىندا يسلامدىق قارجىلاندىرۋدىڭ ودان ءارى دامۋى، يسلامدىق فينتەح، يسلام ەكونوميكاسىنداعى ماركەتينگ جانە ايەلدەر كوشباسشىلىعى سياقتى ماسەلەلەر تالقىلانادى. جالپى، فورۋمنىڭ ەرەكشەلىگى - ورتالىق ازيا مەن تمد ەلدەرىندەگى يسلامدىق قارجى جانە بيزنەس سالاسىنداعى ىقپالدى ايەلدەردى ماراپاتتاۋ سالتاناتى. قازىر قازاقستاندا ءۇش يسلام بانكى جۇمىس ىستەيدى. ولاردىڭ ەكەۋى - قازاقستاندىق يسلام بانكى، ولار: ADCB Islamic جانە Zaman Islamic Bank، سونداي- اق استانا حالىقارالىق قارجى ورتالىعىنىڭ ال- سافي بانكى، - دەدى يسلامدىق قارجى جانە بيزنەس قاۋىمداستىعىنىڭ ءتوراعاسى، استانا حالىقارالىق قارجى ورتالىعىنىڭ يسلام قارجى باعىتى بويىنشا جەتەكشىسى ءمادينا تۋكۋلوۆا.
سونداي-اق بۇگىنگى ءىس- شارا بارىسىندا يسلامدىق قارجى يندۋسترياسىنىڭ دامۋىنا ىقپال ەتەتىن ءبىرقاتار مەموراندۋمعا قول قويۋ جوسپارلانىپ وتىر.
- اتاپ ايتقاندا، استانا حالىقارالىق قارجى ورتالىعى مەن قازاقستان- نيگەريا ىسكەرلىك كەڭەسىن تانىستىراتىن كومپانيا اراسىندا مەموراندۋمعا قول قويىلادى. بۇل مەموراندۋم نيگەريالىق يسلامدىق قارجى كومپانيالارىن قازاقستان نارىعىنا تارتۋعا باعىتتالعان. سونىمەن قاتار يسلامدىق قارجى جانە بيزنەس قاۋىمداستىعى مەن يسلامدىق قۇرىلىسشىلار قاۋىمداستىعى اراسىندا تۇرعىن ءۇي قۇرىلىسى سالاسىنداعى يسلامدىق قارجىلاندىرۋ ماسەلەلەرىن دامىتۋ ماقساتىندا مەموراندۋمعا قول قويىلادى. سونداي-اق يسلامدىق قارجىلاندىرۋ سالاسىنداعى كومپلاەنس ماسەلەلەرىن جانە يسلامدىق قارجىنىڭ دامۋىن ىلگەرىلەتۋ ماقساتىندا Compliance Hub ۇيىمىمەن مەموراندۋمعا قول قويىلادى. ودان بولەك، استانا حالىقارالىق قارجى ورتالىعى قاتىسۋشىلارى، ITS حالىقارالىق پلاتفورماسى جانە زەكەت قورى اراسىندا اۋقىمدى مەموراندۋمعا قول قويىلادى، - دەيدى ول.
فورۋمنىڭ العاشقى سەسسياسى ورتالىق ازيا جانە الەمدە يسلامدىق قارجىنىڭ دامۋ پەرسپەكتيۆالارىنا ارنالدى. سپيكەرلەر يسلامدىق بانكينگتى ەنگىزۋ تاجىريبەسىمەن ءبولىسىپ، حالىقارالىق ىنتىماقتاستىق ماسەلەلەرىن تالقىلاپ جاتىر.
- جالپى قازاقستاندا يسلامدىق قارجىلاندىرۋ جوعارى دەڭگەيدە دامىپ كەلەدى. بىزدە بىرنەشە يسلامدىق قارجى ينستيتۋتى جۇمىس ىستەيدى، زاڭنامالىق بازا قالىپتاسقان جانە قازىر جاڭا يسلامدىق قارجى قۇرالدارىن دامىتۋدا ۇلكەن سەرپىن بايقالىپ وتىر. وتكەن جىلى قازاقستاندا العاش رەت كورپوراتيۆتىك قاتىسۋشىلار ءۇشىن يسلامدىق باعالى قاعازدارى شىعارىلدى. قازاقستاندا جانە استانا حالىقارالىق قارجى ورتالىعى اۋماعىندا العاشقى يسلامدىق ينۆەستيتسيالىق قور قۇرىلدى. ورتالىق ازيا ەلدەرىمەن سالىستىرعاندا، بىزدە تاجىريبە بار جانە بولىسە الامىز. مىسالى، قىرعىزستاندا يسلامدىق قارجىلاندىرۋ بويىنشا زاڭناما بار، ال وزبەكستاندا يسلامدىق بانكينگتى دامىتۋعا قاتىستى زاڭناما قابىلداۋ جوسپارلانىپ وتىر، - دەيدى م. تۋكۋلوۆا.
ايتا كەتەيىك، فورۋمدى يسلامدىق قارجى جانە بيزنەس قاۋىمداستىعى TIDAM اگەنتتىگىمەن بىرلەسىپ، استانا حالىقارالىق قارجى ورتالىعىنىڭ قولداۋىمەن ۇيىمداستىرىپ وتىر. وعان 200 دەن استام ادام قاتىستى.
2019 -جىلى IFSB باس حاتشىسى قازاقستاندا يسلامدىق قارجىلاندىرۋ مۇمكىندىگىنە باعا بەرگەن ەدى.
