استانادا 6 جىلدا 15 وقۋشىلار سارايى اشىلادى
استانا قالاسىندا 2024-جىلى 25 مەكتەپتىڭ قۇرىلىسى جوسپارلانىپ وتىر. ونىڭ 15 ءى «جايلى مەكتەپ» ۇلتتىق جوباسى اياسىندا سالىنادى. بۇل تۋرالى ەلوردا اكىمى جەڭىس قاسىمبەك ەسەپتىك كەزدەسۋىندە ايتىپ بەردى، دەپ حابارلايدى Kazinform.
«استاناداعى ءبىلىم بەرۋ جۇيەسى اسىرەسە جاڭا قۇرىلىس اۋداندارىندا مەكتەپتەر مەن بالاباقشالارداعى ورىن تاپشىلىعىنا ۇشىرادى. ماسەلەنى شەشۋ ءۇشىن بيىل 7 مەكتەپ پايدالانۋعا بەرىلدى، تاعى 5 مەكتەپتىڭ قۇرىلىسى اياقتالىپ كەلەدى»، - دەدى اكىم ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
2024-جىلى قالادا 25 مەكتەپتىڭ قۇرىلىسى جوسپارلانعان، ونىڭ ىشىندە 3 جەكەمەنشىك، 7 مەملەكەتتىك جانە «جايلى مەكتەپ» جوباسى بويىنشا 15 نىسان سالىنادى.
جالپى «جايلى مەكتەپ» جوباسى بويىنشا 90 مىڭ وقۋشىعا ارنالعان 24 مەكتەپ سالىنادى. ونىڭ 15 ءى قارقىندى دامىپ كەلە جاتقان ەسىل جانە نۇرا اۋداندارىندا ورنالاسادى. وسىلايشا، 2028-جىلعا دەيىن ەكى اۋىسىمدا 200 مىڭعا جۋىق ورىنعا ارنالعان 80 نەن استام مەكتەپ سالۋ كوزدەلىپ وتىر.
«2029-جىلعا دەيىن جەرگىلىكتى بيۋجەت جانە مەملەكەتتىك-جەكەشەلىك ارىپتەستىك تەتىگىن قولدانا وتىرىپ، 15 زاماناۋي وقۋشىلار سارايىن سالۋدى جوسپارلاپ وتىرمىز. ەڭ العاشقىسى تۇران داڭعىلىندا ورنالاسقان «سانا» وقۋشىلار سارايى وسى جىلى پايدالانۋعا بەرىلدى. كەلەسى جىلدىڭ ءبىرىنشى توقسانىندا قالانىڭ ءار اۋدانىندا بەس وقۋشىلار سارايىنىڭ قۇرىلىسىن باستايمىز»، - دەپ تولىقتىردى جەڭىس قاسىمبەك.
سونداي-اق، ينۆەستورلار قاراجاتىنا 16 جەكەمەنشىك بالاباقشا سالىنۋدا، 2029-جىلعا دەيىن 60 مەملەكەتتىك بالاباقشا سالۋ جوسپارلانعان. ءبىرىنشى كەزەڭدە 2025-جىلى جەرگىلىكتى بيۋجەت پەن مەملەكەتتىك- جەكە ارىپتەستىك قاراجاتىنا 10 بالاباقشا سالۋ جوسپارلانۋدا.
