استانادا 55 جاستاعى تۇرعىن جۇمىستان زاڭسىز شىعارعان مەكەمەنى سوتقا بەرىپ، جەڭىپ شىقتى
استانا. KAZINFORM - استانا قالاسىنىڭ ازاماتتىق ىستەر جونىندەگى اۋدانارالىق سوتى جۇمىستان زاڭسىز بوساتۋدى داۋلاۋ جانە جۇمىسقا قايتا ورنالاستىرۋ تۋرالى ءىستى قارادى.
ءىستىڭ ءمان-جايىنا سايكەس، 2024 -جىلدىڭ قىركۇيەگىندە جۇمىس بەرۋشىنىڭ بۇيرىعىمەن تالاپ قويۋشى ەڭبەك سىڭىرگەن جىلدارى جانە قىزمەتتى وتكەرۋدىڭ شەكتى جاسىنا جەتۋىنە بايلانىستى جۇمىستان شىعارىلعان.
تالاپ قويۋشى ەكى مىندەتتى كريتەري: ياعني ەڭبەك سىڭىرگەن جىلدارى جانە قىزمەتتى وتكەرۋدىڭ شەكتى جاسىنا جەتۋى - جۇمىستان شىعارۋعا نەگىز بولا الادى دەپ ەسەپتەيدى. وسى كريتەريلەردىڭ كەم دەگەندە بىرەۋى بولماسا بۇل نەگىزدى قولدانۋ مۇمكىن ەمەس.
سوت تالاپ قويۋشىنىڭ 1990-جىلى ىشكى ىستەر ورگاندارىنا قىزمەتكە قابىلدانعانىن جانە 2022 -جىلعا دەيىن قىزمەت ەتكەنىن، سونداي-اق قىزمەتتە بولۋ ءۇشىن شەكتى جاسقا (55 جاس) جەتكەنىن انىقتادى.
تالاپ قويۋشىنىڭ قىزمەت ەتۋ مەرزىمى ەكى رەت ۇزارتىلعان. الايدا ەكى كريتەريگە ءبىر ۋاقىتتا قول جەتكىزۋ تەك 2025 -جىلدىڭ شىلدەسىندە بولادى، سەبەبى جۇمىستان بوساتۋ تۋرالى بۇيرىق شىعارىلعان كەزدە قىزمەت ەتۋدىڭ شەكتى مەرزىمى ءالى كەلمەگەن.
«قۇقىق قورعاۋ قىزمەتى تۋرالى» زاڭدا قىزمەتتە قالدىرۋ مەرزىمىن ۇزارتۋ تۋرالى شەشىم قىزمەتكەردى ەڭبەك سىڭىرگەن جىلدارى جانە قىزمەتتى وتكەرۋدىڭ شەكتى جاسىنا جەتۋىنە بايلانىستى قۇقىق قورعاۋ ورگاندارىنان شىعارۋ مۇمكىندىگىن جوققا شىعارمايتىنى ناقتى كورسەتىلگەن.
بۇل رەتتە زەينەتاقى الۋ قۇقىعىن بەرەتىن قىزمەت وتكەرۋ جاسىنا ءبىر رەت قانا قول جەتكىزۋگە بولادى.
سوت شەشىمىمەن تالاپ قويۋ قاناعاتتاندىرىلدى.
تالاپ قويۋشىنى جۇمىستان شىعارۋ تۋرالى بۇيرىق زاڭسىز دەپ تانىلىپ، ول بۇرىنعى قىزمەتىنە قايتا ورنالاستى.
شەشىم زاڭدى كۇشىنە ەندى.
