استانادا 142 كوماندا باق سىنايتىن الەمدەگى ەڭ مارتەبەلى باعدارلاماشىلار سايىسى باستالدى
استانا. KAZINFORM – ق ر پرەزيدەنتى ورتالىعىندا الەمدەگى ەڭ مارتەبەلى ستۋدەنتتىك سپورتتىق باعدارلامالاۋ سايىسى - ICPC World Finals 2024 فينالىنىڭ اشىلۋ سالتاناتى ءوتتى.
بۇل اۋقىمدى ءىس-شاراعا جىل سايىن الەمنىڭ تۇكپىر-تۇكپىرىندەگى ۇزدىك باعدارلاماشىلار كوماندالارى قاتىسادى.
2023 -جىلى مىسىردىڭ لۋكسور قالاسىندا وتكەن ICPC World Finals جارىسىندا قازاقستاننىڭ التى كومانداسى باق سىناعان. ال قازاقستاندىق باتىر سارداربەكوۆ التىن جۇلدەگە يە بولىپ، ەلىمىزدەن شىققان تۇڭعىش ICPC چەمپيونى اتاندى.
بيىل 111 ەل مەن 3000 ۋنيۆەرسيتەتتىڭ نامىسىن 59000 قاتىسۋشى قورعاپ، ايماقتىق جانە ۇلتتىق ىرىكتەۋدەن سۇرىنبەي وتكەن 142 كوماندا فينالعا شىقتى. قازاقستان اتىنان فينالدا ەلدىڭ ەڭ ۇزدىك تەحنيكالىق ج و و- نىڭ بەس كومانداسى قاتىسادى. بۇل وقيعا قازاقستاننىڭ ورتالىق ازياداعى نەگىزگى IT حاب رەتىندەگى مارتەبەسىن نىعايتۋ جولىنداعى ماڭىزدى قادام بولماق.
«قازاقستان ءۇشىن بۇل وتە ماڭىزدى ءسات، ويتكەنى ءبىز ەلىمىزدىڭ جەتەكشى تەحنيكالىق جوعارى وقۋ ورىندارىنىڭ بەس كومانداسىمەن تانىستىردىق. بۇل ءبىزدىڭ ستۋدەنتتەرىمىزدىڭ جوعارى دايىندىق دەڭگەيىن كورسەتەدى جانە قازاقستاننىڭ ورتالىق ازياداعى نەگىزگى IT حاب رەتىندەگى مارتەبەسىن راستايدى. مۇنداي ءىس- شارالار حالىقارالىق ىنتىماقتاستىقتى نىعايتىپ قانا قويماي، باعدارلاماشىلاردىڭ جاڭا بۋىنىن شابىتتاندىرا وتىرىپ، ەلىمىزدە IT سالانىڭ دامۋىن ىنتالاندىراتىنىنا سەنىمدىمىن. ءبىزدىڭ كوماندالار لايىقتى ناتيجەلەر كورسەتىپ، قازاقستاننىڭ IT- يندۋسترياسىن الەمدىك دەڭگەيدە دامىتۋدى جالعاستىرادى دەپ سەنەمىز»، - دەپ اتاپ ءوتتى سيفرلىق دامۋ مينيسترلىگىنىڭ باسشىسى جاسلان ماديەۆ.
جارىس استانادا 15-20-قىركۇيەك ارالىعىندا وتەدى. چەمپيونات اياسىندا قاتىسۋشىلاردى Huawei ۇيىمداستىراتىن ICPC Challenge ،JetBrains پەن سپورتتىق باعدارلامالاۋدان ەكس الەم چەمپيوندارى وتكىزەتىن blind-coding بويىنشا بىرەگەي شەبەرلىك ساعاتى، سونداي- اق وزگە دە ءىس-شارالار كۇتىپ تۇر.
2024 ICPC World Finals چەمپيوندارى 19-قىركۇيەك كۇنى فيناليستەردىڭ كود ارقىلى الگوريتمدىك ەسەپتەردى شەشۋگە بەرىلگەن بەس ساعاتتىق جارىستى اياقتاعاننان كەيىن، شەكتەۋلى ۋاقىت جاعدايىندا قاتەلەر مەن دۇرىس ەمەس مۇمكىندىكتەر ناتيجەسىندە انىقتالادى.
