استانادا 11 جاسار قىزدىڭ اۋزىندا شاش وسە باستادى
استانا. KAZINFORM - استانادا 11 جاسار وقۋشىنىڭ اۋىز قۋىسىندا تۇك وسە باستادى. اناسى اقمارال شالابايەۆا بۇل جاعدايدى بايقاپ، دەرەۋ دارىگەرلەرگە جۇگىنگەن. الايدا، مامانداردىڭ ءوزى قىزدىڭ ەرەكشە اۋرۋىنا اڭ-تاڭ بولىپ وتىر.
اقمارالدىڭ ايتۋىنشا، 2024-جىلدىڭ ناۋرىزىنا دەيىن قىزدى ەش اۋرۋ مازالاماعان، ادەتتەن تىس ەشتەڭە بايقاماعان. ءتىپتى ناۋرىز ايىنىڭ باسىندا ولار ءتىس دارىگەرىنە بارعان جانە ەمدەۋ كەزىندە ەشقانداي اۋىتقۋ بولماعان.
«15-ناۋرىزدا قىزىم تاماعىنىڭ اۋىرعانىن ايتا باستادى. مەن ونى جرۆي نەمەسە انگينا شىعار دەپ ويلادىم. تاماعىن تەكسەرەيىن دەپ قاراعانىمدا قاتتى تاڭ قالدىم. بادامشا بەزدەرىندە ەكى جاعىنان جانە تىستەرىنىڭ اراسىنان شاش ءوسىپ تۇرعانىن كوردىم»، - دەدى ا. شالابايەۆا اگەنتتىك تىلشىسىنە بەرگەن سۇحباتىندا.
ولار دەرەۋ دارىگەرلەرگە حابارلاسىپ، جەدەل جاردەم شاقىرىپ، ەكىنشى قالالىق اۋرۋحاناعا بارعان.
«دارىگەرلەر دە بۇل قۇبىلىسقا تاڭ قالدى، دەگەنمەن بارلىق تۇكتى پينتسەتپەن الىپ تاستادى. ارينە قىزىما ازداپ قولايسىز بولدى. كەيىن ءبىز كوپتەگەن مەملەكەتتىك جانە جەكە كلينيكالاردىڭ دارىگەرلەرىنە باردىق، وندا بىزگە سىنامالار مەن تەكسەرۋلەردىڭ ۇلكەن ءتىزىمىن بەردى»، - دەيدى اقمارال.
ءوز كەزەگىندە استانا قالاسىنىڭ دەنساۋلىق ساقتاۋ باسقارماسى پاتسيەنتكە وتورينولارينگولوگ، ەندوكرينولوگ جانە باسقا دا بەيىندى مامانداردىڭ تەكسەرۋلەرى، كونسۋلتاتسيالارى وتكىزىلگەنىن اتاپ ءوتتى.
ەلوردالىق دارىگەرلەر مۇنداي قۇبىلىستىڭ پايدا بولۋ سەبەپتەرىن تۇسىندىرە الماي وتىر. دەگەنمەن اناسى مۇنى بالانىڭ جەكە ەرەكشەلىكتەرىمەن بايلانىستىرۋدا.
«قازىر ەمدەۋدىڭ ناقتى ستراتەگياسى جوق، ويتكەنى ناقتى دياگنوز جوق، ونى انىقتاعاننان كەيىن ءبىز دارىگەرلەر مەن بىلىكتى مامانداردىڭ كومەگىمەن شەشىم قابىلدايمىز. ءبىز بارلىق كومەككە نەمەسە كاسىبي كەڭەس الۋعا دايىنبىز»، - دەپ تولىقتىردى ا. شالابايەۆا.
الداعى ۋاقىتتا قىزعا كومپيۋتەرلىك توموگرافيا جانە جاتىر موينى مەن شاپ ايماعىنىڭ ماگنيتتى-رەزونانستىق توموگرافياسى جاسالادى، سودان كەيىن دارىگەرلەر كەلەسى ەمدەۋ جولدارىن بەكىتەدى.
