استاناعا كىرەبەرىستە جۇك كولىكتەرىنىڭ سالماعىن ولشەيتىن جۇيە ىسكە قوسىلدى

استانا قالاسىنا نەگىزگى كىرەبەرىس جولداردا اۆتوماتتاندىرىلعان ولشەۋ جۇيەسى ىسكە قوسىلدى. قۇرىلعى جولداردىڭ بۇزىلۋىنا جول بەرمەۋگە ىقپال ەتەدى. جۇك كولىكتەرى جۇك تاسىمالداۋ بارىسىندا بەلگىلەنگەن نورمادان اسقان جاعدايدا اكىمشىلىك شارالار قاراستىرىلعانىن ۇمىتپاعان ءجون.

اۆتوماتتاندىرىلعان ولشەۋ جۇيەلەرى ىسكە قوسىلعان ساتتەن باستاپ ينسپەكتسيا قىزمەتكەرلەرى سالماق پارامەترلەرىن ۇستانباۋ جانە جۇرگىزۋشىلەردىڭ زاڭ تالاپتارىنا باعىنباۋ فاكتىلەرىن تىركەپ وتىر. ماسەلەن، بۇنداي وقيعا جاقىندا استانانىڭ اينالما جولىندا، ناقتىراق ايتساق قىزىلسۋات اۋىلىنىڭ ماڭىندا تىركەلدى.

بىرنەشە جۇك كولىگىنىڭ جۇرگىزۋشىلەرى كولىكتىك باقىلاۋدان باس تارتىپ، وقيعا ورنىنان قاشىپ كەتىپ قالۋعا تىرىسقان. وقيعا بارىسىندا اۋىر جۇك كولىكتەرىنىڭ ءبىرى ينسپەكتسيانىڭ قىزمەتتىك ماشيناسىنا مەحانيكالىق زاقىم كەلتىردى. جۇرگىزۋشى ۇستالىپ، ۋاقىتشا ۇستاۋ يزولياتورىنا ورنالاستىرىلدى، ال كولىك ايىپپۇل تۇراعىنا جىبەرىلدى.

«اۋىر جۇك كولىكتەرىن جۇرگىزۋشىلەردەن ەرەجەلەردى قاتاڭ ساقتاۋعا جانە بەلگىلەنگەن سالماق پارامەترلەرىنەن اسپاۋعا شاقىرامىز. بۇل نورمالاردى بۇزۋ اكىمشىلىك جاۋاپكەرشىلىككە اكەپ سوعادى»، - دەپ اتاپ ءوتتى اۆتوموبيل كولىگى جانە كولىكتىك باقىلاۋ كوميتەتىنىڭ ءتوراعاسى التاي ءالى.

ەستەرىڭىزگە سالا كەتەيىك، «اۆتوموبيل كولىگى تۋرالى» ق ر زاڭىنىڭ 19-2-بابىنا سايكەس ق ر ك م اۆتوموبيل كولىگى جانە كولىكتىك باقىلاۋ كوميتەتىنىڭ نەگىزگى فۋنكتسيالارىنىڭ ءبىرى رەسپۋبليكا اۋماعىندا ءىرى كولەمدى جانە اۋىر سالماقتى اۆتوكولىك قۇرالدارىنىڭ ءجۇرۋىن باقىلاۋ بولىپ تابىلادى.

ايىپپۇلداردىڭ مولشەرى وسكە شاققانداعى سالماقتىڭ ارتۋ دارەجەسىنە بايلانىستى جانە كاسىپكەرلىك تۇرىنە بايلانىستى - شاعىن، ورتا نەمەسە ءىرى - 40 ا ە ك-تەن (147 مىڭ 680 تەڭگە) 1000 ا ە ك- كە (3 ميلليون 692 مىڭ تەڭگە) دەيىن قۇرايدى.

وسىلايشا، كولىك قۇرالدارىنىڭ رۇقسات ەتىلگەن ماسساسى تومەندە كەلتىرىلگەن نورمادان (توننامەن) اسپاۋى ءتيىس:

- ءۇش ءوستى (م3 ساناتىنداعى بۋىندى اۆتوبۋستاردى قوسپاعاندا) - 25 توننا؛
- ءتورت ءوستى، ونىڭ ىشىندە ەكى باسقارىلاتىن ءوسى بار - 32 توننا؛
- بەس ءوستى - 38 توننا؛
- التى نەمەسە ودان دا كوپ وستەرى بار - 44 توننا.

جولداردىڭ مەرزىمىنەن بۇرىن توزۋىنا الىپ كەلەتىن نەگىزگى فاكتورلاردىڭ ءبىرى رۇقسات ەتىلگەن ماسسادان ارتىق جۇك تيەگەن اۆتوكولىك قۇرالدارى ەكەنىن اتاپ وتكەن ءجون. جوعارىدا اتالعان شارالار اۆتوموبيل جولدارىنىڭ مەرزىمىنەن بۇرىن بۇزىلۋى مەن توزۋىن بولدىرماۋعا، سونداي-اق اۋىر جانە ءىرى كولەمدى كولىك قۇرالدارىن قاداعالاۋعا مۇمكىندىك بەرەدى.