استانا وپەرادا ناۋرىز جىرى شىرقالادى

استانا. قازاقپارات - 20-ناۋرىزدا Astana Opera حالىقارالىق وپەرا اكادەمياسى ۇسىناتىن «ناۋرىز - كوكتەم» كونسەرتى اياسىندا ك. بايسەيىتوۆا اتىنداعى كامەرالىق زال ساحناسىندا ناۋرىز جىرى شىرقالادى. بۇل تۋرالى تەاتردىڭ باسپا ءسوز قىزمەتى ءمالىم ەتتى.

كەشتىڭ ايتۋلى ءساتى حورۆات، ورىس جانە تاجىك سىندى ءتۇرلى ۇلت ۆوكاليستەرىنىڭ ۇلتتىق اندەردى ورىنداۋى بولماقشى. سونداي-اق كورەرمەندەرگە ۇلتتىق مەيرامنىڭ اسەمدىگى مەن ۇلىلىعىن بەينەلەيتىن ۆوكالدىق تۋىندىلارعا تولى جارقىن ءارى جۇرەك تولقىتارلىق باعدارلاما سىيلاۋ ءۇشىن كونسەرت وپەرا اكادەمياسىنىڭ باسقا دا دارىندى جاس سوليستەرىنىڭ باسىن قوسادى.

— Astana Opera حالىقارالىق وپەرا اكادەمياسىنىڭ تىڭداۋشىلارى اتقارعان كونسەرتتەردىڭ كوبى باتىس ەۋروپا كومپوزيتورلارىنىڭ تۋىندىلارىن قامتىعان بولاتىن. تىڭداۋشىلاردىڭ وسى جولعى كۋرسىمەن ءبىز سونداي-اق قازاق مۋزىكاسى ءبولىمىن بەلسەندى ۇيرەنىپ جاتىرمىز. بۇل كونسەرتتە مادەنيەتىمىزدىڭ بايلىعىن كورسەتكىمىز كەلەدى، سوندىقتان ءبىز بارلىعىمىز ۇلتتىق كيىممەن ونەر كورسەتەمىز جانە ساحنانى دا وسىنداي كەرەمەت ستيلدە بەزەندىرەمىز. قازىر قىزۋ دايىندىق ءجۇرىپ جاتىر. ەرەكشە فورماتتا وتەتىن كونسەرت حالىق كومپوزيتورلارىنىڭ جۇرەكتەن شىققان اسەم اندەرى بىرىنەن سوڭ ءبىرى توگىلەتىن تويدى ەسكە تۇسىرەتىن بولادى. اكادەميانىڭ شەتەلدىك تىڭداۋشىلارى قازاق تۋىندىلارىن ورىندايدى. بۇل ولارعا ءبىزدىڭ حالقىمىزدى جاقىنىراق تانۋعا جانە ونىڭ سالت-ءداستۇرىن باعالاۋعا مۇمكىندىك بەرەدى، ويتكەنى مادەنيەت - كەز كەلگەن مەملەكەتتىڭ ءتول بەلگىسى، - دەدى Astana Opera حالىقارالىق وپەرا اكادەمياسىنىڭ اتقارۋشى ديرەكتورى ايسۇلۋ ءتاني.

سوپرانولار لەيلا الامانوۆا، فيرۋزا راحمەتوۆا، اناستاسيا رەمەسكوۆا، تەنورلار نۇرسۇلتان انۋاربەك، مەرەي قادىرحانوۆ، شوحرۋح يۋنۋسوۆ، سونداي-اق باريتوندار سۇلتان باقىتجان، بەكۇلان ەربولات ۇلى، نەماتيللو زكرۋللايەۆ، يۋريتسا يۋراسيچ كاپۋن سىندى تاماشا سوليستەردىڭ ورىنداۋىندا كورەرمەندەر قازاق مادەنيەتىنىڭ بايلىعىن بەينەلەيتىن مۋزىكالىق شىعارمالاردى ەستيدى. باعدارلاما ا. جۇبانوۆ پەن ل. حاميديدىڭ اتتاس وپەراسىنان ابايدىڭ ايگىلى ارياسىنسىز وتپەيدى، وعان قوسا سەگىز سەرىنىڭ «القوڭىرى» جانە تاعى باسقا شىعارمالار شىرقالادى.

«مۋزىكالىق مەرەكەگە دايىندىقتا ۆوكال بويىنشا تالىمگەرلەر دە ماڭىزدى ءرول اتقارادى، ولار - قازاقستاننىڭ ەڭبەك سىڭىرگەن قايراتكەرلەرى ازامات جىلتىركوزوۆ پەن جۇپار عابدۋللينا، سونداي-اق فورتەپيانونى شەبەر مەڭگەرگەن دارىندى كونسەرتمەيستەرلەر دينا ميرمانوۆا مەن جانار احمەتوۆا. ءوز ءىسىنىڭ كاسىبي شەبەرلەرى ساحنادا مەرەكەلىك اتموسفەرا جاساۋعا كومەكتەسىپ، ءاربىر كورەرمەنگە جۇرەكتەردى كوكتەمگى جىگەرمەن تولتىراتىن مۋزىكا مەن سەزىمدەر الەمىنە ەنۋگە مۇمكىندىك بەرەدى» - دەلىنگەن حابارلامادا.

وسىلايشا، «ناۋرىز - كوكتەم» كونسەرتى جاس وپەرا ورىنداۋشىلارىنىڭ مۋزىكالىق شىعارماشىلىعىن ۇسىنىپ، شاتتىقتى، جاڭارۋ مەن گۇلدەنۋدى بەينەلەيتىن كوپشىلىك ۇناتاتىن جالپى حالىقتىق مەيرامدى مەرەكەلەۋ كەزىندەگى مادەنيەتتەر مەن داستۇرلەردى بىرىكتىرۋدىڭ وزىندىك ءبىر نىشانىنا اينالماق.