استانا - ترانسكاسپي اۆتوجولىن سالۋ كيىك پوپۋلياتسياسىنا قالاي اسەر ەتەدى

استانا. KAZINFORM - ەكولوگيالىق كودەكستىڭ قازىرگى رەداكسياسى ءىرى جول جوبالارىن ىسكە اسىرعان كەزدە باتىس قىتاي - باتىس ەۋروپا حالىقارالىق كولىك ءدالىزىن سالعان شاقتا جىبەرىلگەن كەمشىلىكتەرگە جول بەرمەيدى. ەكولوگيا جانە تابيعي رەسۋرستار مينيسترلىگى Kazinform ساۋالىنا جولداعان جاۋاپتا وسىنداي ۇستانىم ءبىلدىردى.

ماسەلە قايدان شىقتى؟

پرەزيدەنت قاسىم-جومارت توقايەۆ بۋرابايدا وتكەن ۇلتتىق قۇرىلتايدا ۇكىمەتكە استانادان ارقالىق، تورعاي جانە ىرعىز ارقىلى ترانسكاسپي حالىقارالىق كولىك دالىزىنە تۋرا شىعاتىن اۆتوكولىك جولىنىڭ قۇرىلىسىن باستاۋدى تاپسىردى.

بۇل وڭىرلەر كيىكتىڭ تىرشىلىك ايماعى بولىپ ەسەپتەلەدى. ال كولىك اعىنى مول، شەكتى جىلدامدىعى جوعارى دالىزدەردىڭ كيىك ميگراتسياسىنا كەرى اسەر ەتەتىنىن باتىس قىتاي - باتىس ەۋروپا ءدالىزىنىڭ تاجىريبەسى كورسەتىپ وتىر. استانا - ترانسكاسپي اۆتوجولىن جوبالاۋشىلار وسى ماسەلەنى قانشالىقتى ەسكەرىپ وتىر دەگەن سۇراق تۋىندايدى.

مينيسترلىكتىڭ ۇستانىمى قانداي؟

- اتالعان اۆتوكولىك جولىنىڭ جوباسى بويىنشا ەكولوگيا جانە تابيعي رەسۋرستار مينيسترلىگىنە قازىرگى ۋاقىتتا رەسمي ماتەريالدار تۇسپەگەن. جوبالىق- سمەتالىق قۇجاتتامالار جانە ەكولوگيالىق ساراپتاما ماتەريالدارى ۇسىنىلعان جاعدايدا، قولدانىستاعى زاڭناماعا سايكەس ەكولوگيالىق باعالاۋ راسىمدەرى جۇرگىزىلەدى.

مينيسترلىك ءوز قۇزىرەتى اياسىندا جابايى جانۋارلاردىڭ، سونىڭ ىشىندە كيىكتەردىڭ ميگراتسيالىق دالىزدەرىنە ىقتيمال اسەرلەردى باعالاۋعا ەرەكشە نازار اۋدارادى. بۇل ورايدا بۇرىنعى ينفراقۇرىلىمدىق جوبالاردا (مىسالى، «باتىس قىتاي - باتىس ەۋروپا» ءدالىزى) جىبەرىلگەن كەمشىلىكتەر ەسكەرىلىپ وتىر، - دەپ جازىلعان ۆەدومستۆونىڭ رەسمي جاۋابىندا.

فوتو: قازاۆتوجول

ەكولوگيا كودەكسى نە دەيدى؟

مينيسترلىك ماماندارى باتىس قىتاي - باتىس ەۋروپا ءدالىزىن سالعاندا كەتكەن قاتەلىكتەر ەكولوگيا كودەكسىنىڭ قازىرگى رەداكسياسىندا ەسكەرىلگەنىن ايتىپ وتىر.

- كودەكس نورمالارى بولاشاقتا ۇسىنىلاتىن كەز كەلگەن كولىك جوباسىن مەملەكەتتىك ەكولوگيالىق ساراپتامادان وتكىزۋدى مىندەتتەيدى. وسى ساراپتاما زياندى اسەردى بولدىرماۋ نەمەسە ازايتۋ بويىنشا ناقتى ۇسىنىستاردى قامتۋ كەرەك. ونىڭ ىشىندە:

ەكولوگيالىق وتكەلدەر (فاۋناعا ارنالعان وتكەلدەر) سالۋ قاجەتتىلىگى؛
كيىك ميگراتسياسىنا كەدەرگى كەلتىرمەۋ ماقساتىندا جولداردا قورشاۋلاردىڭ ءۇزىلىسىن، كوپىرلى قۇرىلىمداردى نەمەسە جاساندى وتكەلدەردى قاراستىرۋ مۇمكىندىگى؛
جوبالاۋ ساتىسىندا زوولوگيا ينستيتۋتىنىڭ جانە تابيعات قورعاۋ ۇيىمدارىنىڭ ۇسىنىستارىن ەسكەرۋ، - دەيدى. 

اۆتور

ەسىمجان ناقتىباي