استانا مەن الماتىدا فرانسۋز تىلىندەگى مەكتەپتەر اشىلماق
وقۋ- اعارتۋ مينيسترلىگى قازاقستاندا فرانسۋز مەكتەپتەرىن اشۋ جوسپارىن جاريالادى، دەپ حابارلايدى Kazinform.
«فرانسيا پرەزيدەنتى ەممانيۋەل ماكروننىڭ 2023-جىلعى 1-قاراشاداعى قازاقستان رەسپۋبليكاسىنا رەسمي ساپارى اياسىندا ەكى ەل ۇكىمەتتەرى اراسىنداعى حالىقارالىق (فرانسۋز) مەكتەپتەردى اشۋ مەن قازاقستان رەسپۋبليكاسىنىڭ ءبىلىم بەرۋ ۇيىمدارىندا فرانسۋز ءتىلىن وقىتۋعا قاتىستى كەلىسىمگە قول قويىلدى. قازىر قازاقستان رەسپۋبليكاسى وقۋ-اعارتۋ مينيسترلىگى حالىقارالىق مەكتەپتەردى اشۋ تۋرالى كەلىسىمدى جۇزەگە اسىرۋ تۇرعىسىندا جۇمىس توبىن قۇرۋدى ىسكە اسىرىپ جاتىر. كەلىسىمگە سايكەس 2025-جىلعا دەيىن استانا مەن الماتى قالالارىندا فرانسۋز تىلىندە وقىتاتىن مەكتەپتەر اشۋ جوسپارلانعان»، - دەلىنگەن مينيسترلكتىڭ Kazinform اگەنتتىگىنە بەرگەن جاۋابىندا.
مەكتەپتەردەگى ساباقتار فرانسۋز تىلىندە، سونداي- اق قازاق، ورىس جانە اعىلشىن تىلدەرىندە وتەدى. حالىقارالىق مەكتەپتىڭ ءبىلىم بەرۋ باعدارلاماسىنا ەنگىزۋ ءۇشىن مىندەتتى پاندەر رەتىندە قازاق ءتىلى مەن ادەبيەتى، قازاقستان تاريحى جانە گەوگرافيا بولادى. قازىر مەكتەپتەردىڭ جۇمىس ىستەۋىنە قاتىستى باسقا دا ۇيىمداستىرۋ ماسەلەلەرى پىسىقتالىپ جاتىر.
ەسكە سالساق، بيىل 1-قاراشادا استانادا فرانسيا پرەزيدەنتى ەممانيۋەل ماكرونمەن كەزدەسۋ كەزىندە قازاقستان پرەزيدەنتى قاسىم-جومارت توقايەۆ ءبىلىم جانە عىلىم سالاسىنداعى جوبالاردى قولعا الۋعا ەرەكشە كوڭىل بولىنگەنىن اتاپ ءوتتى.
«ەلىمىزدە فرانسۋز مەكتەپتەرىن اشۋعا، فرانسۋز ءتىلىن ۇيرەتۋگە، اكادەميالىق بايلانىستى ارتتىرۋعا باعىتتالعان ءبىرقاتار كەلىسىمگە قول قويىلدى. ءبىز مۇنى جوعارى باعالايمىز»، - دەدى قاسىم-جومارت توقايەۆ.
