استانا مەن الماتىدا بەت-الپەتتى تانۋ جۇيەسى ىسكە قوسىلدى

استانا. KAZINFORM - قازاقستاننىڭ ەكى قالاسىندا بەت-الپەتتى تانۋ جۇيەسى جۇمىسىن باستادى. بۇل تۋرالى ءى ءى م حابارلادى.

يننوۆاتسيالىق جوبا ىشكى ىستەر مينيسترلىگى، ۇلتتىق قاۋىپسىزدىك كوميتەتى جانە سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ ىنتىماقتاستىعىمەن ازىرلەنگەن.

«ۇلتتىق بەينەمونيتورينگ جۇيەسى جاساندى ينتەللەكت تەحنولوگيالارىنىڭ قولدانىلۋىمەن ىزدەۋدەگى ادامداردى تانۋعا، قوعامدىق ورىنداردا قالدىرىلعان زاتتار تۋرالى سيگنال بەرۋگە، قۇقىق بۇزۋشىلىقتاردى اۆتوماتتى رەجيمدە تىركەۋگە مۇمكىندىك بەرەدى. سونداي-اق كومپيۋتەرلىك باعدارلاما كولىكتى ماركاسى، مودەلى جانە ءتۇسى بويىنشا سايكەستەندىرە الادى. «اقىلدى» كامەرالاردىڭ نازارىندا تەمىرجول ۆوكزالدارى، اۋەجايلار، قوناق ۇيلەر، كوشەلەر جانە ساۋدا ويىن-ساۋىق ورتالىقتارى سياقتى نىساندار بار. جۇيە ءوز تيىمدىلىگىن كورسەتتى. دۇنيەجۇزىلىك كوشپەندىلەر ويىندارىن وتكىزۋ كەزىندە ەلوردانىڭ قوعامدىق ورىندارىندا جوعالعان بالالاردى، سونداي-اق ەسەپتە تۇرعاندار مەن حابار-وشارسىز كەتكەن ادامداردى جەدەل تابۋعا مۇمكىندىك تۋدى. بەينە-تالداۋ جۇيەسىنىڭ كومەگىمەن استانادا ىزدەۋدە جۇرگەن 46 قۇقىق بۇزۋشى جەدەل تۇردە انىقتالىپ ۇستالدى. وسىعان ۇقساس جۇمىس الماتىدا جۇرگىزىلىپ جاتىر. وندا وسىنداي 30 ادام انىقتالىپ قۇرىقتالدى»، - دەدى ءى ءى م.

ەنگىزىلگەن تەحنولوگيالار - اقىلدى قالالاردى قۇرۋعا جاسالعان قادام. ولار قوعامدىق قاۋىپسىزدىك دەڭگەيىن ارتتىرىپ، قىلمىستى ازايتۋعا كومەكتەسەدى. مۇنداي جۇيەلەر قىتايدا، رەسەيدە جانە ەۋروپا ەلدەرىندە بەلسەندى قولدانىلادى.

«قازاقستان ۇزدىك تاجىريبەلەردى يگەرىپ، وسى الەمدىك ءۇردىستىڭ ءبىر بولىگىنە اينالۋدا. الداعى ۋاقىتتا كامەرالار سانىن ۇلعايتا وتىرىپ، بەينەمونيتورينگتى كەڭەيتۋ جوسپارلانىپ وتىر. بۇل كەزەڭ-كەزەڭىمەن جۇرگىزىلەتىن بولادى. ايتا كەتەيىك، بۇگىنگى تاڭدا مەنشىك تۇرىنە قاراماستان ەلىمىزدە 1 ميلليون 359 مىڭ بەينەكامەرا بار، ونىڭ 310 مىڭى جەدەل باسقارۋ ورتالىقتارى جانە پوليتسيانىڭ كەزەكشى بولىمدەرىنە شىعارىلعان. يننوۆاتسيالىق جوبالاردىڭ قىلمىسقا قارسى ءىس-قيمىلدا جانە ادامدار كوپ جينالاتىن جەرلەردە قوعامدىق قاۋىپسىزدىكتى قامتاماسىز ەتۋدە كومەگى زور. ىسكە قوسىلعان جۇيەلەردىڭ باستى ماقساتى - ءاربىر ازاماتتىڭ زاڭ مەن ءتارتىپ ورناعان قوعامدا ءوزىن قاۋىپسىز سەزىنۋىنە جاعداي جاساۋ»، - دەلىنگەن مينيسترلىك حابارلاماسىندا.