استانا مەن الماتى اۋەجايلارىندا مايمىل شەشەگى ينفەكسياسىنا قارسى وقۋ-جاتتىعۋ ءوتتى
استانا. KAZINFORM - ق ر دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق قىزمەتى استانا جانە الماتى حالىقارالىق اۋەجايلارىندا مايمىل شەشەگى سياقتى كارانتيندىك جانە اسا قاۋىپتى ينفەكسيا بەلگىلەرى بار ادامداردى انىقتاۋدى قوسا العاندا، قوعامدىق دەنساۋلىق ساقتاۋ سالاسىنداعى توتەنشە جاعدايلارعا دەن قويۋعا دايىندىق بويىنشا وقۋ-جاتتىعۋلار وتكىزدى.
«وقۋ-جاتتىعۋلار بارلىق نەگىزگى قىزمەتتەردىڭ: سانيتاريالىق-ەپيدەميولوگيالىق، شەكارالىق، كەدەندىك، سونداي-اق اۋەجاي، جەلىلىك پوليتسيا ءبولىمى، اۋەجايدىڭ مەديتسينالىق پۋنكتى، جەدەل مەديتسينالىق كومەك جانە مەديتسينالىق ۇيىمداردىڭ ءوزارا ءىس-قيمىلىن پىسىقتاۋعا باعىتتالعان»، - دەلىنگەن حابارلامادا.
ينفەكسيالىق اۋرۋلارعا كۇدىكتى جولاۋشىلار انىقتالعان كەزدە ءىس-قيمىلدى ۇيلەستىرۋگە ەرەكشە نازار اۋدارىلادى.
وقۋ-جاتتىعۋ بارىسىندا شارتتى تۇردەگى مايمىل شەشەگى اۋرۋى تارتىلدى. پەرسونال جولاۋشىدان اۋرۋ بەلگىلەرىن انىقتاۋدان باستاپ ونى اۋرۋحاناعا جاتقىزۋعا جانە قاجەتتى ەپيدەمياعا قارسى جانە دەزينفەكسيالىق شارالاردى جۇرگىزۋگە دەيىنگى ءىس-شارالاردىڭ تولىق تسيكلىنەن ءوتتى.
جاتتىعۋ كەزىندە بارلىق قىزمەتتەر ءىس-قيمىلدىڭ جوعارى دارەجەدەگى دايىندىعى مەن ۇيلەسىمدىلىگىن كورسەتتى، بۇل ولاردىڭ ىقتيمال قاۋىپتەرگە دەن قويۋعا دايىن ەكەندىگىن راستايدى.
وقۋ-جاتتىعۋ قورىتىندىسى بويىنشا سەمينار-كەڭەس وتكىزىلدى، وندا ءار قىزمەتتىڭ ءىس-قيمىلى تالقىلانىپ، ۆەدومستۆوارالىق ءوزارا ءىس-قيمىلدى كۇشەيتۋ بويىنشا ۇسىنىستار بەرىلدى.
