استانا ماڭىندا اۋىلداردىڭ تۇرمىستىق جاعدايى نەگە تومەن؟ وبلىس اكىمى جاۋاپ بەردى

اقمولا وبلىسىنىڭ اكىمى مارات احمەتجانوۆ استانا ماڭىنداعى اقمولاعا قاراستى ەلدى مەكەندەردىڭ جاعدايى تۋرالى ايتتى.

اكىمنىڭ ايتۋىنشا، وبلىسقا استانا قالاسىنىڭ توڭىرەگىندە 46 اۋىلدى مەكەن كىرەدى.

«رەسمي مالىمەت 180 مىڭ ادام تۇرادى، ال ناقتىراق ايتساق 300 مىڭنان اسادى. ويتكەنى بۇرىن شاعىن عانا بولعان اۋىلداردىڭ كولەمى قازىر اۋداندارمەن تەڭەسىپ كەتتى. ماسەلەن، قوياندى اۋىلى - 40 مىڭ، جىبەك جولى - 30 مىڭ استام جانە تالاپكەردە 30 مىڭنان استام ادام تۇرادى. قوسشىدا رەسمي ساناق بويىنشا 52 مىڭ ادام، ال نەگىزى 100 مىڭنان اسىپ كەتكەن»، - دەدى وبلىس باسشىسى و ك ق- دا وتكەن بريفينگتە.

اكىم حالىق سانى بويىنشا ارنايى تالداۋ جۇرگىزگەنىن ايتادى.

«ءوڭىر حالقىن تەلەفون نومىرلەرى ارقىلى ساراپتاما جۇرگىزدىك، ناتيجەسىندە 214 مىڭ ازامات بارى انىقتالدى. ياعني ءبىزدىڭ ازاماتتار كۇندىز استانادا تۇندە اقمولادا تۇنەيدى. ونى توقتاتۋ ءۇشىن ارنايى جوسپارلارىمىز بار. ەڭ باستىسى بۇگىنگى «اگلومەراتسيا تۋرالى» زاڭدى پايدالانىپ، ۇكىمەتكە قاۋلى دايىنداپ جاتىرمىز. استانا اكىمدىگىمەن بىرگە جۇمىس ىستەيتىن بولامىز. ونىڭ ىشىندەگى 300 ءىس-شارادا سۋ، جارىق، جىلۋ ماسەلەسى قاراستىرىلعان. سونداي-اق ول جەرلەرگە جاقسى مەكتەپ، ەمحانا، دەنە شىنىقتىرۋ ورتالىقتارى كەرەك»، - دەدى احمەتجانوۆ.

احمەتجانوۆتىڭ ايتۋىنشا، قوسشى قالاسىندا مۇنداي جۇمىستار باستالىپ كەتتى.

جەكە ينۆەستيتسيانىڭ ارقاسىندا جاڭا مەكتەپ سالىندى. قۇنى - 7,5 ميلليارد تەڭگە. ونداي مەكتەپتەر قازاقستاندا از. ەندى ول جەرگە جەكە ينۆەستيتسيا كوزىنەن قوعامدىق ورتالىق سالىنىپ جاتىر، ونىڭ قۇنى - 9,5 ميلليارد. ءبىزدىڭ ۇسىنىپ وتىرعان ۇكىمەت قاۋلىمىزدا وسى ۇسىنىستار بار، - دەيدى ول.