استانا ل ر ت جوباسى قانداي جاڭا تەحنولوگيامەن سالىنىپ جاتىر
استانا. KAZINFORM - قىتايلىق China construction كومپانياسى شەتەلدىك بيزنەس دەپارتامەنتىنىڭ باس مەنەدجەرى حان يۋلون استانادا سالىنىپ جاتقان جەڭىل رەلستى كولىك جەلىسى (Astana LRT) قانداي تەحنولوگيا قولدانىپ جاتقانى تۋرالى ايتتى.
حان يۋلوننىڭ ايتۋىنشا، LRT جەلىسى ورتالىق ازياداعى العاشقى جۇرگىزۋشىسىز باسقارىلاتىن (اۆتوپيلوت جۇيەسى) جىلجىمالى قۇرام بولماق.
- Astana LRT جوباسى قىتاي- قازاقستان ەكى ەل اراسىنداعى «ءبىر بەلدەۋ - ءبىر جول» باستاماسىندا ايرىقشا ماڭىزى بار جوبا سانالادى. سوندىقتان، ءبىز بۇل جوباعا ەرەكشە ءمان بەرەمىز. جوبانىڭ ءساتتى جانە ساپالى اياقتالۋى ءۇشىن قۇرىلىس جۇمىستارىنا «قىتايلىق ستاندارتقا» نەگىزدەلگەن سوڭعى تەحنولوگيالاردى قولدانىپ وتىرمىز. مىسالى، LRT جەلىسىنىڭ جىلجىمالى قۇرامى قاشىقتىقتان جۇرگىزۋشىسىز باسقارىلادى، - دەدى China construction باس مەنەدجەرى.
ونىڭ ايتۋىنشا، LRT جەلىسىنىڭ ەسىل وزەنىن كەسىپ وتەتىن جەرىندە جاڭا كوپىر سالىندى. جوبا «عاسىرلىق جوبا» ستاندارتىنا ساي بولۋ ءۇشىن قىتايلىق جەتەكشى تەحنولوگيا قولدانىلدى.
- كوپىردىڭ جالپى ۇزىندىعى - 155 مەتر. بۇل كوپىردىڭ نەگىزگى ارقالىقتارى بولات كونسترۋكسيادان قۇرالىپ، كوپىر بەتىنە ارماتۋرا ارالاسقان بەتون قۇيىلادى. بولات كونسترۋكسيا قىتايداعى سوڭعى تەحنولوگيا دوعالىق دانەكەرلەۋ «روبوتى» ارقىلى دانەكەرلەنىپ، «قۇراستىرمالى بلوك» ءادىسى بويىنشا قۇرىلىس جۇرگىزىلدى. بۇل كۇندە كوپىردىڭ نەگىزگى قۇرىلىسى اياقتالىپ، كوپىردىڭ جالپى سالماعى 2598 توننانى قۇرادى، - دەدى حان يۋلون.
جەڭىل رەلستى كولىك جۇيەسىنىڭ (Astana LRT جوباسى) قورشاعان ورتاعا اسەرىن ازايتۋ ماقساتىندا دىبىس كەدەرگىسى قولدانىلادى.
سونداي-اق، بۇعان دەيىن استاناداعى جەڭىل رەلستى كولىك جۇيەسىنىڭ (Astana LRT جوباسى) جەرۇستى نەگىزگى قۇرىلىس جۇمىستارى قاشان اياقتالاتىنىن جازعان ەدىك.
اۆتور
مۇحتار قاليموللا ۇلى
