استانا حالىقارالىق فورۋمى جۇمىسىن باستادى
استانا. KAZINFORM - ەلوردادا مەملەكەت باسشىسى قاسىم-جومارت توقايەۆتىڭ قاتىسۋىمەن استانا حالىقارالىق فورۋمى جۇمىسىن باستادى.
الەمدىك كوشباسشىلاردى، ساراپشىلاردى، ينۆەستورلار مەن بيزنەس وكىلدەرىن بىرىكتىرەتىن ايماقتاعى ەڭ ءىرى ىسكەرلىك ءىس- شارا باعدارلاماسى بۇگىننىڭ نەگىزگى سىن- قاتەرلەرىن قامتىعان پلەنارلىق سەسسيا مەن 25 پىكىرتالاس الاڭىنان تۇرادى. الەمنىڭ تۇكپىر-تۇكپىرىنەن 600 گە جۋىق شەتەلدىك قوناق قاتىسپاق. ولاردىڭ اراسىندا جەتەكشى ساياساتكەرلەر، حالىقارالىق ۇيىم، كورپوراتسيا باسشىلارى، ينۆەستورلار مەن عىلىمي توپ وكىلدەرى بار.
جالپى، فورۋمعا 7000 نان استام قاتىسۋشى تىركەلگەن. ەۋروپا، ورتالىق ازيا، تاياۋ شىعىس پەن افريكا ەلىنەن ب ۇ ۇ، ا ا ۇ، ح ك ۇ جانە د ز م ۇ سياقتى جەتەكشى حالىقارالىق ۇيىمداردىڭ اتىنان 160 تان استام سپيكەر قاتىسادى. ەكى كۇن بويى ولار ءتۇرلى سالانىڭ ساراپشىلارىمەن بىرلەسىپ، مەملەكەتارالىق ىنتىماقتاستىق مودەلىن، جاڭا جاھاندىق ارىپتەستىك قۇرۋدىڭ كەلەشەگىن قاراستىرادى.
مارتەبەلى مەيماندار قاتارىندا رۋاندا رەسپۋبليكاسىنىڭ پرەزيدەنتى پول كاگامەنى، البانيا پرەمەر- ءمينيسترى ەدي رامانى، حورۆاتيا رەسپۋبليكاسىنىڭ پرەمەر- ءمينيسترى اندرەي پلەنكوۆيچتى، قاتار پرەمەر- ءمينيسترى - سىرتقى ىستەر ءمينيسترى شەيح مۇحاممەد بەن ابدۋلراحمان ءال ءتانيدى اتاپ وتۋگە بولادى.
بيىل AIF جاھاندىق كۇن تارتىبىندەگى نەگىزگى ءۇش باعىتقا نازار اۋدارادى:
سىرتقى ساياسات جانە حالىقارالىق قاۋىپسىزدىك
ەنەرگەتيكا جانە كليماتتىڭ وزگەرۋى
ەكونوميكا جانە قارجى.
- استانا حالىقارالىق فورۋمى 2025 ينۆەستيتسيا ءۇشىن جاھاندىق باسەكەلەستىك داۋىرىندە وتكىزىلىپ، قازاقستاننىڭ الەمگە اشىقتىعىن كورسەتەدى. ءبىزدىڭ ەلىمىز ءىرى الەمدىك كورپوراتسيالار مەن قارجى ينستيتۋتتارىنىڭ نازارىن اۋدارا وتىرىپ، ورتالىق ازياداعى ءوز پوزيتسياسىن نىعايتا تۇسپەك. اۋقىمدى رەفورمالار، زاڭنامانى جاڭعىرتۋ مەن ينۆەستيتسيالىق احۋالدى جاقسارتۋ ەلدىڭ دامۋىنا جانە ونىڭ ەكونوميكالىق مۇمكىندىگىن كەڭەيتۋگە ىقپال ەتەدى. فورۋمنىڭ مىندەتى - اشىق ديالوگ پەن شەتەلدىك كاپيتال تارتۋدىڭ، ستراتەگيالىق كەلىسىمدەر جاساسۋ مەن ەكونوميكالىق دامۋعا ارنالعان باستامالاردى ىلگەرىلەتۋ ءۇشىن ماڭىزدى پلاتفورما بولۋ، - دەپ اتاپ وتەدى حالىقارالىق ءىس- شارانى ۇيىمداستىرۋعا جاۋاپتى ەلىمىزدىڭ ۇلتتىق ەكونوميكا مينيسترلىگىنەن.
