استانا حابى مەن جوعارى سوت كەڭەسى سۋديالاردى ىرىكتەۋ جۇيەسىن بىرگە جەتىلدىرمەك
استانا. KAZINFORM - استانا مەملەكەتتىك قىزمەت حابى مەن جوعارى سوت كەڭەسى اراسىندا ءوزارا تۇسىنىستىك تۋرالى مەموراندۋمعا قول قويىلدى.
استانا مەملەكەتتىك قىزمەت حابى باسقارۋشى كوميتەت ءتوراعاسى اليحان بايمەنوۆ پەن جوعارى سوت كەڭەسى ءتوراعاسى دەنيس شيپتىڭ كەزدەسۋى اياسىندا تاراپتار كەلىسىمگە كەلدى. ەكى جاق سۋديا كادرلارىن ىرىكتەۋ پروتسەستەرىن جەتىلدىرۋ، ولاردىڭ الەۋەتىن ارتتىرۋ جانە وسى سالاداعى ۇزدىك حالىقارالىق تاجىريبەمەن تانىسۋ ماسەلەلەرىندە ىنتىماقتاستاسۋعا ۋاعدالاستى.
دەنيس شيپ ءوز سوزىندە مەملەكەتتىك قىزمەت سالاسىندا كەڭىنەن قولدانىلاتىن ادىستەر مەن قۇرالدار سۋديالاردى ىرىكتەۋ كەزىندە دە پايدالانىلاتىنىن اتاپ ءوتتى. سونداي-اق ول كەڭەستىڭ فۋنكتسيالارى مەن مىندەتتەرىنە توقتالا وتىرىپ، سۋديالاردى كونكۋرس ارقىلى ىرىكتەۋ، ولاردىڭ تاۋەلسىزدىگى مەن دەربەس قۇقىعىن كۇشەيتۋمەن بىرگە تارتىپتىك جاۋاپكەرشىلىك تەتىكتەرىن دە جەتىلدىرۋ ماسەلەلەرىنە نازار اۋدارتتى.
اليحان بايمەنوۆ ءوز كەزەگىندە حاب پەن جوعارعى سوت كەڭەسى اراسىنداعى ارىپتەستىكتىڭ ماڭىزىنا ەرەكشە توقتالدى. ويتكەنى ونىڭ ايتۋىنشا، سوت جۇيەسى مەن ءادىل سوت تورەلىگىن ىسكە اسىرۋعا دەگەن سەنىم سۋديالار كورپۋسىن ىرىكتەۋ ساپاسىنا تىكەلەي بايلانىستى. سوندىقتان حاب سۋديا كادرلارىن ىرىكتەۋ ماسەلەلەرىندە ساراپتاما-تالداۋ جاعىنان قولداۋ كورسەتۋىن ودان ءارى جالعاستىرماق.
2021 -جىلدىڭ قىركۇيەگىنەن حاب پەن جوعارعى سوت كەڭەسى ارىپتەستىگى اۋقىمىندا سۋديالاردى ىرىكتەۋ قۇرالدارىن جەتىلدىرۋ، تسيفرلاندىرۋدى ەنگىزۋ، سۋديالاردى ىرىكتەۋ جۇيەسىنە قوعامدىق سەنىمدى انىقتاۋ بويىنشا جوبالار جۇزەگە استى.
الەمنىڭ 43 ەلىنەن تۇراتىن استانا مەملەكەتتىك قىزمەت حابى دۇنيە جۇزىندەگى مەملەكەتتىك قىزمەتتى رەفورمالاۋ بويىنشا ءبىلىمى مەن ساراپتاۋ قاۋقارى زور 90 نان استام ينستيتۋتسيونالدىق سەرىكتەسپەن ارىپتەستىك ورناتقان.
