استانا-دەلي باعىتى بويىنشا جاڭا رەيس اشىلادى
استانا. KAZINFORM - ءۇندىستان مەن قازاقستان استانالارى اراسىندا جاڭا مارشرۋت ىسكە قوسىلادى.
ق ر كولىك مينيسترلىگى ۇشۋ گەوگرافياسىن كەڭەيتۋ جانە ەلىمىزدىڭ اۋە تاسىمالدار نارىعىنداعى شەتەلدىك «لوۋ-كوست» اۋە كومپانيالاردىڭ ۇلەسىن ۇلعايتۋ بويىنشا جۇمىس جالعاسىپ جاتقانىن مالىمدەدى.
5-اقپاندا قازاقستاننىڭ اۆياتسيالىق بيلىگى استانا قالاسىنىڭ حالىقارالىق اۋەجايى وكىلدەرىنىڭ قاتىسۋىمەن «Indigo» ءۇندى «لوۋ-كوست» اۋە كومپانياسىنىڭ باسشىلىعىمەن كەزدەسۋ وتكىزدى.
وسى جىلدىڭ 14-مامىرىنان باستاپ «Indigo» اۋە كومپانياسى استانا-دەلي باعىتى بويىنشا جاڭا باعىت اشۋدى جوسپارلاپ وتىر. رەيستەر A-320/321 ءتيپتى اۋە كەمەلەرىندە اپتاسىنا 3 رەت جيىلىكپەن ورىندالادى.
قازاقستان مەن ءۇندىستان استانالارى اراسىندا تىكەلەي رەيستىڭ اشىلۋى ەلدەر اراسىنداعى ىنتىماقتاستىقتى ودان ءارى دامىتۋعا جانە ەلدىڭ ترانزيتتىك الەۋەتىن دامىتۋعا ىقپال ەتەتىن بولادى. سونىمەن قاتار بۇعان دەيىن حابارلانعانداي، «ەير استانا» قازاقستاندىق اۋە كومپانياسى وسى جىلدىڭ 20-ساۋىرىنەن باستاپ «Airbus» ۇلگىسىندەگى اۋە كەمەسىندە اپتاسىنا 3 رەت جيىلىكپەن الماتى-مۋمباي باعىتى بويىنشا ءۇندىستانعا رەيستەر اشادى.
جالپى، كوكتەمگى-جازعى ناۆيگاتسيا كەزەڭىندە ەلدەر اراسىنداعى جولاۋشىلار رەيستەرىنىڭ 5 اۋە باعىتى بويىنشا اپتاسىنا 24 رەيسكە دەيىن ۇلعايتۋ جوسپارلانعان. قازىر تۇراقتى اۋە قاتىناسى الماتى-دەلي («ەير استانا» - اپتاسىنا 7 رەيس، «indiGo» - اپتاسىنا 7 رەيس)، الماتى - گوا (SCAT - 2)، استانا - گوا (FlyArystan - 2) باعىتتارى بويىنشا ورىندالادى.
الماتىدان مۋمبايعا تىكەلەي رەيس اشىلاتىنىن جازعان بولاتىنبىز.
