استانا اينالاسىنا 7 بلوكپوست قويىلدى
ەلوردادا شەت مەملەكەتتەر باسشىلارىنىڭ قاتىسۋىمەن وتەتىن ءىرى قوعامدىق-ساياسي ءىس- شارالارعا بايلانىستى پوليتسيا قىزمەتى كۇشەيتىلگەن جۇمىس رەجيمىنە اۋىستى، دەپ حابارلايدى Kazinform.
«قۇرمەتتى قالا تۇرعىندارى جانە قوناقتارى! ەلوردادا الداعى ۋاقىتتا شەت مەملەكەتتەر باسشىلارىنىڭ قاتىسۋىمەن وتەتىن ءىرى قوعامدىق-ساياسي ءىس-شارالارعا بايلانىستى قۇقىقتىق ءتارتىپ پەن قاۋىپسىزدىكتى قورعاۋدىڭ ءتيىستى دەڭگەيىن قامتاماسىز ەتۋ ءۇشىن پوليتسيا دەپارتامەنتىنىڭ جەكە قۇرامى كۇشەيتىلگەن قىزمەتكە كوشتى»، - دەپ جازىلعان قالالىق پوليتسيا دەپارتامەنتىنىڭ رەسمي حابارلاماسىندا.
بۇگىننەن، ياعني 31-قازان ساعات 8.00 دەن باستاپ قالانىڭ پەريمەترى بويىنشا قاراعاندى، قوسشى، كوكشەتاۋ، پاۆلودار قالالارىنىڭ، سونىمەن قاتار قورعالجىن، استارحانكا كەنتتەرىنەن، حالىقارالىق اۋەجايدان قالاعا كەلەتىن جولدارعا 7 بلوكپوست قويىلدى.
«بۇل شارا ازاماتتاردىڭ قۇجاتتارىن، سونداي-اق اۆتوكولىكتە تىيىم سالىنعان زاتتاردىڭ بار-جوعىن تەكسەرۋگە باعىتتالادى. قالا تۇرعىندارى مەن قوناقتارىنان اتالعان ءىس-شارا مەن كەلتىرىلگەن قولايسىزدىقتارعا تۇسىنىستىكتىك تانىتۋلارىڭىز سۇرالادى»، - دەيدى دەپارتامەنت.
ايتا كەتەيىك، 1-قاراشادا مەملەكەت باسشىسى قاسىم-جومارت توقايەۆتىڭ شاقىرۋىمەن فرانسيا پرەزيدەنتى ەممانيۋەل ماكرون قازاقستانعا رەسمي ساپارمەن كەلەدى.
ال 2-قاراشادا استانا قالاسىنا ماجارستان پرەمەر-ءمينيسترى ۆيكتور وربان رەسمي ساپار جاسايدى.
3-قاراشادا ەلوردادا تۇركى مەملەكەتتەرى ۇيىمىنىڭ (ت م ۇ) مەرەيتويلىق X سامميتى وتەدى.
جيىنعا تۇركى مەملەكەتتەرى ۇيىمىنا مۇشە ەلدەر - ازەربايجان، قىرعىزستان، تۇركيا، وزبەكستان پرەزيدەنتتەرى، سونداي-اق ت م ۇ-عا باقىلاۋشى مەملەكەتتەر - ماجارستان مەن تۇرىكمەنستان باسشىلارى قاتىسادى.
