استانا اسپانىندا قارۋلى كۇشتەردىڭ يسترەبيتەلدەرى ۇشادى
استانا. قازاقپارات - 23-24-قاراشا كۇندەرى استانادا قازاقستان قارۋلى كۇشتەرى اۆياتسياسىنىڭ جوسپارلى ۇشۋلارى وتەدى. بۇل تۋرالى قورعانىس مينيسترلىگى حابارلادى.
«2024-جىلعى 23-24-قاراشا كۇندەرى استانا قالاسىنان قازاقستان قارۋلى كۇشتەرى اۆياتسياسىنىڭ جوسپارلى ۇشۋلارى وتەدى. اتالعان ءىس-شارا ارنايى ءتۇتىندى پايدالانۋ ارقىلى قازاقستان رەسپۋبليكاسى اۋە قورعانىسى كۇشتەرىنىڭ وقۋ-جاتتىعۋ ۇشۋلارى شەڭبەرىندە وتكىزىلمەك. اۆياتسيانىڭ ۇشۋى قاۋىپسىز بيىكتىكتە وتەتىندىكتەن، قالا ءومىرىنىڭ ادەتتەگى قالپىن بۇزبايدى. ءىس-شارا ۇشۋ قاۋىپسىزدىگى شارالارىنا سايكەس ۇيىمداستىرىلاتىندىقتان، تۇرعىندارعا ەشقانداي قاۋىپ توندىرمەيدى. قولدانىلاتىن ءتۇرلى-ءتۇستى تۇتىندەردىڭ ەكولوگيالىق زيانى جوق»، - دەلىنگەن حابارلامادا.
ەسكە سالساق، مەملەكەت باسشىسى ۋكرايناداعى احۋالدىڭ ۋشىعۋىنا بايلانىستى ەلىمىزدەگى ءتيىستى قۇرىلىمدارعا شۇعىل شارالار قابىلداۋدى تاپسىردى.
سونىمەن قاتار پرەمەر-مينيستر ولجاس بەكتەنوۆ قورعانىس، ىشكى ىستەر، توتەنشە جاعدايلار، سىرتقى ىستەر، دەنساۋلىق ساقتاۋ، كولىك، ەنەرگەتيكا، ونەركاسىپ جانە قۇرىلىس، ۇلتتىق ەكونوميكا، قارجى مينيسترلىكتەرىنىڭ باسشىلىعىمەن مەملەكەت باسشىسىنىڭ نەگىزگى اسكەري جانە ازاماتتىق وبەكتىلەردىڭ قاۋىپسىزدىگىن قامتاماسىز ەتۋ جونىندە شۇعىل شارالار قابىلداۋ تۋرالى تاپسىرمالارىن ورىنداۋ جونىندە جەدەل كەڭەس وتكىزدى.
