استانا، الماتى كوشەلەرىندە ايقايلاپ ءجۇرىپ جارناما تاراتۋعا تىيىم سالىنۋى مۇمكىن

استانا. KAZINFORM - استانا مەن رەسپۋبليكالىق ماڭىزى بار قالالاردىڭ اشىق كەڭىستىگىندە اۋديو جارناما تاراتۋعا تىيىم سالىنۋى مۇمكىن. ماجىلىستە ءبىرىنشى وقىلىمدا تالقىلانىپ جاتقان زاڭ جوباسىندا وسىنداي نورما بار.

- سونىمەن قاتار، قالانىڭ سىرتقى كەلبەتىنىڭ ناشارلاۋىنا قوعامدىق ورىنداردا اۋديو جارنامانىڭ كەڭ تارالۋى سەبەپ بولىپ وتىر. بۇگىنگى تاڭدا اتالعان ارەكەتتەر زاڭ بۇزۋشىلىققا جاتپايدى جانە زاڭنامادا ەشقانداي اكىمشىلىك شارالار كوزدەلمەگەن. وسىلايشا اشىق كەڭىستىكتە اۋديو جارنامانى تاراتۋعا تىيىم سالۋ ۇسىنىلادى، - دەدى زاڭ جوباسىن تانىستىرعان پرەمەر- ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين.

دەپۋتات رينات زايىتوۆ استانادا مۇقاعالي ماقاتايەۆتىڭ ولەڭدەرىن ايتىپ ءجۇرىپ جارناما جاسايتىن ادامدار بار ەكەن، الماتىدا ءان ارقىلى جارناما جاسايتىن ۇجىمداردى بىلەتىنىن ايتتى. ونىڭ سوزىنشە، مۇنداي ارەكەتكە تۇرعىندار كورنەكى جارناماعا اقشاسى بولماعاندىقتان بارادى. سوندىقتان مۇنداي تىيىم ورىنسىز دەپ ەسەپتەيتىنىن ايتتى.

استانا قالاسى اكىمىنىڭ ورىنباسارى ەرسىن وتەبايەۆ مۇنداي نورما اتالعان قالا تۇرعىندارىنىڭ شاعىمىنان كەيىن قۇجاتقا ەنگىزىلگەنىن ايتتى.

- ءال سىز ايتقان جەكەلەگەن جاعدايلاردى جەكە زەرتتەۋگە بولادى. زاڭ جوباسى بۇگىن بەكىتىلەدى دەگەن ءسوز ەمەس قوي. ءالى دە پىسىقتايىق، - دەدى اكىمدىك وكىلى.

ەسكە سالساق، الماتىدا دۇڭگىرشەكتەن تۇرعىنداردىڭ اشۋىنا تيگەن جازۋى الىنىپ تاستالعان بولاتىن.

اۆتور

ەسىمجان ناقتىباي