استانا اكىمى پرەزيدەنتكە جىلۋ ماۋسىمىنىڭ بارىسىن باياندادى

مەملەكەت باسشىسى استانا قالاسىنىڭ اكىمى جەڭىس قاسىمبەكتى قابىلدادى. پرەزيدەنتكە ەلوردانىڭ الەۋمەتتىك-ەكونوميكالىق جانە ينفراقۇرىلىمدىق دامۋى تۋرالى باياندالدى، دەپ حابارلايدى Kazinform.

قاسىم-جومارت توقايەۆقا نەگىزگى ەكونوميكالىق كورسەتكىشتەر بويىنشا وڭ ديناميكا بار ەكەنى جونىندە مالىمەت بەرىلدى. بيىلعى 10 ايدىڭ ىشىندە ءبىر تريلليون تەڭگەدەن استام ينۆەستيتسيا تارتىلعان. جىل سوڭىنا دەيىن جالپى سوماسى 87,7 ميلليارد تەڭگە بولاتىن 25 ينۆەستيتسيالىق جوبانى، سونىڭ ىشىندە وڭدەۋ ونەركاسىبى سالاسىندا 14، ءبىلىم جانە مەديتسيناعا قاتىستى 7، لوگيستيكا باعىتىندا 4 جوبانى ىسكە قوسۋ جوسپارلانىپ وتىر. بۇل باستامالار 1,4 مىڭ جۇمىس ورنىن اشۋعا مۇمكىندىك بەرەدى.

مەملەكەت باسشىسىنا جىلىتۋ ماۋسىمىنىڭ بارىسى تۋرالى دا ايتىلدى. اتاپ ايتقاندا، بيىل كۇزدە «وڭتۇستىك- شىعىس» گاز جىلۋ ستانتسياسىنىڭ، «تۇران» گاز جىلۋ ستانتسياسىنىڭ ءبىرىنشى كەزەڭىنىڭ جانە ءۇشىنشى جەو- نىڭ ءبىرىنشى كەزەڭىنىڭ قۇرىلىسى اياقتالدى. ەلوردانىڭ تىنىس-تىرشىلىگىن قامتاماسىز ەتەتىن بۇل نىسانداردىڭ قۋاتى - ساعاتىنا 1140 گيگاكالوريا. قالا ۇزاق ۋاقىتتان بەرى العاش رەت بيىلعى جىلىتۋ ماۋسىمىندا جىلۋ ەنەرگياسىنا دەگەن سۇرانىستى ارتىعىمەن قامتاماسىز ەتەتىن بولدى.

كەلەسى جىلى «تەلمان» گاز جىلۋ ستانتسياسىنىڭ ءبىرىنشى جانە «تۇران» گاز جىلۋ ستانتسياسىنىڭ ەكىنشى كەزەڭى پايدالانۋعا بەرىلەدى دەپ جوسپارلانىپ وتىر. بۇل نىساندار قالانى قوسىمشا 850 گكال/ساعات جىلۋمەن قامتۋعا سەپتىگىن تيگىزەدى.

سونىمەن قاتار جەڭىس قاسىمبەك الەۋمەتتىك نىساندار (مەكتەپ، جەڭىلدىكپەن بەرىلەتىن قولجەتىمدى تۇرعىن ۇيلەر، مەديتسينالىق ورتالىقتار) سالۋ، قۇرىلىسى ۇزاققا سوزىلعان نىسانداردىڭ جۇمىسىن اياقتاۋ، اپاتتى جاعدايداعى ەسكى ۇيلەردى ءسۇرۋ، تۇرعىن ءۇي الاپتارىن دامىتۋ جانە باسقا دا جۇمىستار جونىندە باياندادى. اتاپ ايتقاندا، كەلەسى جىلى ەلوردادا بەس وقۋشىلار سارايىنىڭ، سونداي- اق مەملەكەتتىك بالاباقشالاردىڭ قۇرىلىسى باستالادى.

كەزدەسۋ سوڭىندا قاسىم-جومارت توقايەۆ الەۋمەتتىك جانە ينجەنەرلىك ينفراقۇرىلىمدى ودان ءارى دامىتۋ جونىندە ءبىرقاتار تاپسىرما بەردى.