استانا اكىمى LRT- دە جول ءجۇرۋ باعاسى قانشا بولاتىنىن ايتتى
استانا. KAZINFORM - استانا اكىمى جەڭىس قاسىمبەك سارايشىق اۋدانى تۇرعىندارىمەن كەزدەسۋدە LRT- دە جول ءجۇرۋ بيلەتىنىڭ باعاسى قانشا بولاتىنىن ايتتى.
- LRT بيلەتىنىڭ باعاسى بويىنشا ايتساق، جوبالىق باعا بەلگىلەنگەن. 100 تەڭگەدەن 200 تەڭگەگە دەيىن دەپ جوبالاپ وتىرمىز. ازىرگە وسىنداي مەجە قالا بەرەدى، - دەدى اكىم.
ەسكە سالساق، بيىل كۇزدە LRT- ءنى تەستىلىك رەجيمدە ىسكە قوسۋ جوسپارلانعان.
سونداي-اق استانا اكىمى ەلورداداعى اقىلى تۇراقتار جاڭا ينۆەستورعا بەرىلۋى مۇمكىن دەگەن مالىمەتتەردى تەرىسكە شىعارعان ەدى.
اكىم اقىلى تۇراقتاردى جاڭا ينۆەستورعا بەرۋ ماسەلەسى كۇن تارتىبىندە جوق ەكەنىن ءمالىم ەتتى.
- مەن وسىدان 2-3 اي بۇرىن الدىن الا حابارلاعان ەدىم. «استانا تۇراق كەڭىستىگى» مەكەمەسىن كوممۋنالدىق مەنشىككە وتكىزەتىنىمىزدى ايتقانمىن. بۇل ماسەلەمەن كولىك باسقارماسى تىكەلەي اينالىسادى. قازىرگى تاڭدا ينۆەستورمەن كەلىسىمشارتتى توقتاتۋ باعىتىندا جۇمىس ءجۇرىپ جاتىر. مەكەمە كوممۋنالدىق مەنشىككە بەرىلەدى، - دەدى جەڭىس قاسىمبەك.
