استانا اكىمى ل ر ت قۇرىلىسىنىڭ بارىسى تۋرالى ايتتى

استانا. KAZINFORM - استانا قالاسىنىڭ اكىمى جەڭىس قاسىمبەك Instagram-داعى پاراقشاسىندا LRT قۇرىلىسى قالاي ءجۇرىپ جاتقانى تۋرالى جازدى.

-  112-ستانسياعا (ابۋ دابي پلازا) بارىپ، LRT قۇرىلىسىنىڭ بارىسىمەن تانىستىم. ماسەلەن، ابۋ دابي پلازاداعى  112-ستانسيادا جالپى اۋدانى شامامەن 5 مىڭ شارشى مەتر بولاتىن قاسبەتتىڭ سىرتقى مەتالل قاڭقاسىن مونتاجداۋ، ارى قاراي ۆيتراجدار مەن پانەلدەردى ورناتۋ جۇمىسى جۇرگىزىلىپ جاتىر. بيىل 3-توقساندا سىناق جۇمىسىن باستاۋ ءۇشىن وسىعان ۇقساس جۇمىس بارلىق 18 ستانسيادا اياقتالاتىن بولادى، - دەدى اكىم.

ونىڭ سوزىنشە، وسىعان دەيىن ەستاكادانىڭ قۇرىلىسى اياقتالىپ، ستانتسيالاردىڭ نەگىزگى تەمىربەتون كونسترۋكسيالارى سالىنعان.

- ەسىل وزەنى ارقىلى وتەتىن اسپالى كوپىردىڭ قۇرىلىسى، 101-ستانسيانىڭ قاسبەتتىك بولىگىنىڭ قۇرىلىسى اياقتالدى. سول سياقتى LRT قۇرامىنىڭ 19 بىرلىگىنە تاپسىرىس بەرىلدى. LRT جەلىسى ستانتسيالارىنىڭ نەگىزگى تەمىربەتون كونسترۋكسيالارىنىڭ قۇرىلىسى %100 اياقتالدى.  116- جانە  117-ستانسيالار اراسىنداعى ەستاكادا ۋچاسكەسىندە رەلس جولىنىڭ العاشقى 500 مەترى توسەلدى. 2025 -جىلدىڭ سوڭىنا دەيىن جولدىڭ جوعارعى بولىگىنىڭ قۇرىلىسىن تولىقتاي اياقتاۋ، ونىڭ ىشىندە رەلستەردى توسەۋ، دابىل جانە بايلانىس جۇيەلەرىن باپتاۋ، ستانسيالاردى ىشكى جانە سىرتقى ارلەۋ، قۇرامداردى جەتكىزۋمەن دەپو سالۋ جوسپارلانىپ وتىر، - دەپ ءتۇسىندىردى جەڭىس قاسىمبەك.

سونىمەن قاتار، ەلوردا اكىمى 2025 -جىلى قابانباي باتىر داڭعىلى مەن قالداياقوۆ كوشەسىندەگى LRT-نىڭ استىڭعى ەستاكادالىق بولىگىن اباتتاندىرۋ جوسپارلانىپ وتىرعانىن ايتتى.

- ءبىز LRT بويىنداعى مارشرۋتتى كەزەڭ- كەزەڭىمەن اباتتاندىرامىز. مىسالى، بيىل قابانباي باتىر داڭعىلىن اۋەجايدان ماڭگىلىك ەل داڭعىلىنا دەيىن اۋقىمدى كوگالداندىرۋ جوسپارلانعان. سىعاناق كوشەسىنىڭ بويىنداعى ۋچاسكەدە (قابانباي باتىر داڭعىلىنان تاۋەلسىزدىك داڭعىلىنا دەيىن) اعاشتار، ۆەلوجولدار، ءبىرىڭعاي ستيلدەگى كوشە جيھازدارى ورناتىلادى. LRT-نىڭ نەگىزگى ايالدامالارىنىڭ جانىندا - Mega Silk Way س و و، بوتانيكالىق ب ا ق جانە «پوكولەنيە» ت ك ماڭىندا قالا تۇرعىندارىنىڭ دەمالىسى مەن ۋاقىتىن پايدالى وتكىزۋى ءۇشىن جاڭا قوعامدىق كەڭىستىكتەر اشىلادى. ولار زاماناۋي اباتتاندىرىلعان، قالانىڭ تارتىمدى ءارى ىڭعايلى ورىندارىنىڭ بىرىنە اينالادى، - دەپ جازدى جەڭىس قاسىمبەك.

بۇدان بۇرىن استانادا LRT-نىڭ العاشقى دايىن ستانساسى كورسەتىلگەن بولاتىن.