استانا اكىمى كوممۋنالدىق تاريف تۋرالى: باعا ءبىر ورنىندا تۇرمايدى

استانا. KAZINFORM - استانا اكىمى جەڭىس قاسىمبەك قالادا سارقىندى سۋ مەن ەلەكتر تاريفىنىڭ قىمباتتاۋىنا بايلانىستى پىكىر ءبىلدىردى.

- بىلتىردان بەرى استانالىقتار كوممۋنالدىق قىزمەتكە كوپ شىعىندالاتىندارىن ايتىپ، شاعىمدانىپ ءجۇر. سوعان قاراماستان جۋىقتا سارقىندى سۋ مەن ەلەكتر تاريفىنىڭ قىمباتتايتىنى بەلگىلى بولدى. بۇل ونسىز دا تاريفتىڭ قىمباتتىعىنا شاعىمدانىپ جۇرگەن جۇرت ءۇشىن جىعىلعان ۇستىنە جۇدىرىق بولماي ما، - دەپ سۇرادى جۋرناليست.

جەڭىس قاسىمبەك قالانىڭ اۋقىمى ءوسىپ، تۇرعىندار كوبەيگەن سايىن كوممۋنالدىق قىزمەتپەن قامتۋ شىعىندارى ارتىپ جاتقانىن ايتادى.

- ونى سالىستىرۋ كەرەك. سوڭعى رەت تاريف قاشان وزگەردى. مىسالى، اۋىزسۋدىڭ 1 تەكشە مەترى بىزدە 60-70 تەڭگە بولاتىن. ال كورشى وڭىرلەردە سۋ باعاسى 150-200 تەڭگە بولدى. استانادا بىرنەشە جىل قاتارىنان كوممۋنالدىق باعالار وزگەرمەدى. سوڭعى جىل، ەندى ءبارىبىر وزگەرۋ كەرەك قوي. ءبىر دەڭگەيدە ءبارىبىر تۇرمايدى. مىسالى اۆتوبۋستىڭ باعاسىن بىلتىر 90 تەڭگەدەن 110 تەڭگەگە وزگەرتتىك. 90 تەڭگە دەگەن باعا 2014-جىلدان بەرى، 10 جىل بويى ساقتالىپ كەلگەن. جالپى بىزدە سوڭعى 4-5 جىلدا باعا بويىنشا ۇلكەن وزگەرىستەر بولعان جوق. ەندى كەيىنگى 1,5 جىلدىڭ ىشىندە ءبىز باعانى ءبىر دەڭگەيگە كوتەرىپ جاتىرمىز. جالپى قازاقستان بويىنشا ايتساق، ءبىزدىڭ تاريفتەر وزگە وڭىرلەرگە قاراعاندا ورتاشا دەپ ايتۋعا بولادى. ەلەكتر باعاسى دا رەسپۋبليكالىق ورتاشا باعامەن قارايلاس. قازىر قوعامدىق تىڭداۋ ءوتىپ جاتىر. سول كەزدە ناقتى بەلگىلى بولادى، - دەدى اكىم.

ەسكە سالساق، «استانا - وڭىرلىك ەلەكترجەلىلىك كومپانياسى» ا ق ەلەكتر ەنەرگياسىنىڭ شەكتى تاريفىن 1 كيلوۆاتت ساعاتىنا 31,67 تەڭگەگە دەيىن كوتەرۋدى ۇسىنىپ وتىرعانىن جازعان ەدىك.

سونداي-اق، ەلوردادا سارقىندى سۋعا قاتىستى تاريف ءوسۋى مۇمكىن.