استانا اكىمى پاراليمپيادا جۇلدەگەرلەرىنە 25-30 ميلليون تەڭگە جانە پاتەر سىيلادى
استانا. KAZINFORM - استانا قالاسىنىڭ اكىمى جەڭىس قاسىمبەك Instagram پاراقشاسىندا پاراليمپيادا ويىندارىندا ەل قورجىنىنا مەدال سالعان سپورتشىلارمەن كەزدەسكەنى تۋرالى جازدى، دەپ حابارلايدى ەلوردا اكىمدىگىنىڭ رەسمي سايتى.
«پاراليمپيادا ويىندارىنىڭ ەلوردالىق جۇلدەگەرلەرىمەن كەزدەستىم. اقمارال ناۋاتبەك ەلىمىزگە كوپتەن كۇتكەن جەڭىس سىيلادى. ول پارا دزيۋدودان الەم چەمپيونى اتانعان جانە پاراليمپيادا التىنىن جەڭىپ العان العاشقى قازاقستاندىق سپورتشى رەتىندە ەل تاريحىنا ەندى. الەم الدىندا كوك تۋىمىزدى جەلبىرەتكەن تاعى ءبىر ەلوردالىق سپورتشى - ەرعالي شامەي. ەرعالي كۇمىس مەدال جەڭىپ الدى. ولاردىڭ جەڭىسىنىڭ ارتىندا توقتاۋسىز جاتتىعۋلار، تەمىردەي ءتارتىپ، شىدامدىلىق، جاقىندارىنىڭ، باپكەرلەرىنىڭ قولداۋى، وزىنە دەگەن سەنىم جاتىر»، - دەپ جازدى جەڭىس قاسىمبەك.
ءوز كەزەگىندە قالا اكىمى اقمارال ناۋاتبەككە 3 بولمەلى پاتەردىڭ سەرتيفيكاتىن جانە 30 ميلليون تەڭگە اقشالاي سىياقى، ال ونىڭ جاتتىقتىرۋشىسى ايدىن اناپينگە 10 ميلليون تەڭگە تابىس ەتتى.
ال، ەرعالي شامەيگە 2 بولمەلى پاتەردىڭ سەرتيفيكاتى مەن 25 ميلليون تەڭگە اقشالاي سىياقى، ال ونىڭ جاتتىقتىرۋشىسى داۋرەن ورازوۆقا 7 ميلليون تەڭگە تابىس ەتىلدى. اقشالاي سىياقى دەمەۋشىلەر تاراپىنان بەرىلدى.
اڭگىمە اراسىندا جەڭىس قاسىمبەك سپورتشىلارعا قولداۋ كورسەتۋدى ارى قاراي دا جالعاستىراتىنىن، سونىمەن قاتار قالانىڭ سپورتتىق ينفراقۇرىلىمىن جاقسارتىپ، بۇقارالىق سپورتپەن شۇعىلدانۋ ءۇشىن، ونىڭ ىشىندە بالالار مەن جاس وسپىرىمدەرگە ارنالعان سپورت مەكتەپتەرىنە ءتيىستى جاعداي جاسايتىنىن اتاپ ءوتتى.
ەسكە سالا كەتەيىك، بۇعان دەيىن قازاقستان دزيۋدوشىلارى تاجىكستانداعى الەم چەمپيوناتىندا باق سىنايتىنىن جازعان ەدىك.
