استانا اكىمدىگى نەلىكتەن تيمۋر قۇلىبايەۆتىڭ كومپانياسىن سوتقا بەردى

استانا. KAZINFORM - استانا قالاسىنىڭ اۋدانارالىق ەكونوميكالىق سوتى ەلوردانىڭ جەر رەسۋرستارى باسقارماسىنىڭ «كيپروس» ج ش س-نە جەردى ماجبۇرلەپ الىپ قويۋ تۋرالى تالابىن قاناعاتتاندىردى.

استانا قالاسى الماتى اۋدانى پروكۋراتۋراسىنىڭ ۇسىنىسى بويىنشا ەلوردانىڭ جەر رەسۋرستارى باسقارماسى «كيپروس» ج ش س-نە قاراستى جەرلەردىڭ ۇزاق ۋاقىت پايدالانباۋ فاكتىسى بويىنشا تەكسەرۋ جۇرگىزگەن.

تەكسەرۋ قورىتىندىسى بويىنشا كومپانيا زاڭبۇزۋشىلىقتاردى جويۋ تۋرالى نۇسقاما العان.

«نۇسقاما تالاپتارىن ورىنداماۋىنا بايلانىستى ۆەدومستۆو «كيپروس» ج ش س مەنشىك يەسىنەن جەر ۋچاسكەلەرىن الىپ قويۋ جونىندە ارىز بەردى»، - دەلىنگەن اۋىل شارۋاشىلىعى مينيسترلىگىنىڭ Kazinform اگەنتتىگى جولداعان ساۋالعا جاۋابىندا.

وسىلايشا 2024 -جىلعى 19-شىلدەدە استانا قالاسىنىڭ اۋدانارالىق ەكونوميكالىق سوتى اتالعان كومپانياعا تيەسىلى اۋىل شارۋاشىلىعى ماقساتىنداعى جەردى ماجبۇرلەپ الىپ قويۋ تۋرالى ەلوردانىڭ جەر رەسۋرستارى باسقارماسىنىڭ تالابىن قاناعاتتاندىردى.

سونداي-اق، ۆەدومستۆودان «كيپروس» ج ش س قالالىق سوتتىڭ شەشىمىنە اپەللياتسيالىق شاعىم ءتۇسىرۋى مۇمكىن ەكەنىن حابارلادى.

ايتا كەتەيىك، «كيپروس» ج ش س-نىڭ جالعىز قۇرىلتايشىسى - قازاقستاندىق كاسىپكەر تيمۋر قۇلىبايەۆ.

كومپانيا 1994 -جىلدىڭ قازان ايىندا تىركەلگەن.

2015-2023 -جىلدار ارالىعىندا كومپانيا 13,1 ميلليارد تەڭگە سالىق تولەگەن، ال ەڭ جوعارى كورسەتكىش 2023 -جىلى تىركەلدى (2,2 ميلليارد تەڭگە).

اۆتور
داۋلەت ىزتىلەۋ