استانا اكىمدىگى كادر دايارلاۋعا 1087 ءبىلىم بەرۋ گرانتىن بولمەك
استانا. KAZINFORM - استانا اكىمدىگى بيىل جوعارى جانە جوعارى وقۋ ورنىنان كەيىنگى ءبىلىمى بار كادرلاردى دايارلاۋعا 1087 ءبىلىم بەرۋ گرانتىن بولمەك. بۇل تۋرالى استانا قالالىق ءبىلىم باسقارماسىنىڭ باسشىسى قاسىمحان سەنعازيەۆ ايتتى.
«كادر تاپشىلىعىن جويۋ ءۇشىن قالا اكىمدىگى جىل پەداگوگيكالىق، مەديتسينالىق ماماندىقتار بويىنشا، سونداي-اق گۋمانيتارلىق باعىت بويىنشا جوعارى جانە جوعارى وقۋ ورنىنان كەيىنگى ءبىلىمى بار كادرلاردى دايارلاۋعا مەملەكەتتىك ءبىلىم بەرۋ تاپسىرىسىن بولەدى. 2024-2028 وقۋ جىلدارىنا قالا اكىمدىگى جوعارى جانە جوعارى وقۋ ورنىنان كەيىنگى ءبىلىمى بار كادرلاردى دايارلاۋعا 1087 ءبىلىم بەرۋ گرانتىن ءبولدى. ءبىلىم باسقارماسىنان پەداگوگيكالىق ماماندىقتاردىڭ قاجەتتىلىگى بويىنشا 950 ورىنعا باكالاۆرعا جانە «داعدارىس پسيحولوگياسى» ماگيستراتۋراسىنا 50 ورىنعا ءوتىنىم بار»، - دەدى ول استانا قالالىق قوعامدىق كەڭەسىنىڭ وتىرىسىندا.
ونىڭ دەرەگىنشە، بۇگىندە قالادا ءۇش اۋىسىمدى وقىتاتىن 8 مەكتەپ جانە 16 تىعىزدالعان مەكتەپ بار. ەگەردە بەس جىل بۇرىن قالادا جالپى سانى 188841 وقۋشى ءبىلىم الاتىن 91 مەملەكەتتىك جانە 32 جەكەمەنشىك مەكتەپ بولسا، 2024-جىلى جالپى سانى 263902 وقۋشى بار 102 مەملەكەتتىك جانە 66 جەكەمەنشىك مەكتەپ جۇمىس ىستەپ تۇر.
«كونتينگەنتتىڭ تىعىزدىعى ماسەلەسى جاڭا مەكتەپتەر سالۋ جانە قوسىمشا عيماراتتار سالۋ ارقىلى شەشىلىپ كەلەدى. «جايلى مەكتەپ» جوباسى اياسىندا 2024-جىلدىڭ سوڭىنا دەيىن 20400 وقۋشىعا ارنالعان 12 مەكتەپ قۇرىلىسىن اياقتاۋ جوسپارلانعان. 2750 ورىندىق جۇمىس ىستەپ تۇرعان 3 مەكتەپكە جاپسارجاي سالۋ، 1500 ورىندىق 2 تيپتىك مەكتەپتەر قۇرىلىسىن اياقتاۋ كوزدەلگەن»، - دەدى باسقارما باسشىسى.
قاسىمحان سەنعازيەۆتىڭ اتاپ وتۋىنشە، قوعامدىق دەنساۋلىق ساقتاۋ باسقارماسىنان 72 ورىنعا مەديتسينالىق ماماندىقتاردىڭ قاجەتتىلىگى بويىنشا ءوتىنىم بار. ولار مىنا ماماندىقتار:
- شۇعىل مەديتسينا - 33 ورىن،
- تەراپيا – 5،
- جالپى حيرۋرگيا، ەرەسەكتەر ونكولوگياسى – 3،
- وفتالمولوگيا، پەدياتريا، فتيزياتريا، انەستەزيولوگيا جانە رەانيماتولوگيا، جۇقپالى اۋرۋلار، نەوناتولوگيا، اكۋشەرلىك جانە گينەكولوگيا، وتباسىلىق مەديتسينا، وتورينولارينگولوگيا – 2،
- گاستروەنتەرولوگيا، كلينيكالىق فارماكولوگيا، نەيروحيرۋرگيا، تراۆماتولوگيا-ورتوپەديا، فيزيكالىق مەديتسينا جانە وڭالتۋ، ەندوكرينولوگيا، يادرولىق مەديتسينا - 1.
مۇنان بولەك، دەنە شىنىقتىرۋ جانە سپورت باسقارماسىنان دەنە شىنىقتىرۋ جانە سپورت قاجەتتىلىگى بويىنشا 10 ورىنعا، ءدىن ىستەرى باسقارماسىنان يسلامتانۋ، تەولوگيا، ءدىنتانۋ ماماندارىنىڭ قاجەتتىلىگى بويىنشا (ماگيستراتۋرا) 5 ورىنعا ءوتىنىم بار.
